Tash, që partneri i koalicionit qeveritar, LDK-ja, ka paralajmëruar mocion mosbesimi ndaj Qeverisë Kurti, hapi i radhës është mbledhja e nënshkrimeve të deputetëve.
Sipas nenit 100, pika 1, të Kushtetutës së Kosovës, duhen firmat e 1\3 të të gjithë deputetëve që mocioni të shkojë për procedurë të mëtutjeshme në Kuvend.
Pra mjaftojnë 40 firma. Aktualisht, LDK-ja numëron 28 deputetë në Kuvend.
Sipas pikës 3 të nenit 100 të Kushtetutës, mocioni i mosbesimit vihet në rend dite në Kuvend, jo më vonë se pesë ditë, e as më herët se dy ditë nga data e parashtrimit të tij.
Për të kaluar mocioni, duhen votat pro të shumicës të të gjithë deputetëve, pra 61. Këtë e precizon pika 4 e nenit 100 të Kushtetutës.
Në historinë parlamentare të Kosovës, vetëm një Qeveri është rrëzuar me mocion mosbesimi, ajo e Isa Mustafës në vitin 2017. Për mocionin e paraqitur atëbotë nga partitë opozitare kishin votuar pro 78 deputetë, përfshirë edhe ata të Lidhjes Demokratike që kishte kryeministrin.
Edhe
Opozita synon ta rrëzojë Qeverinë në shtator me vota nga VV-ja
Tash, LDK-ja është sërish në koalicionin qeveritar, por kryeministri i takon partnerit – VV-së.
LDK-ja mori këtë nismë para pak minutash në mbledhjen e Kryesisë, meqë gjatë ditës kryeministri Albin Kurti liroi nga pozita e ministrit të Punëve të Brendshme, Agim Veliun, me arsyetimin se ka shpërndarë panik në kohën kur vendi po kalon emergjencë shkaku i koronavirusit.
Në rast se mocioni i mosbesimit dështon, mocioni tjetër nuk mund të ngrihet gjatë nëntëdhjetë ditëve të ardhshme. E nëse mocioni i mosbesimit votohet për Qeverinë në tërësi, Qeveria konsiderohet në dorëheqje.
