Partia Demokratike e Kosovës (PDK) i është kundërpërgjigjur kryetarit të Aleancës për Ardhmërinë e Kosovës (AAK), Ramush Haradinaj, i cili ka kohë që është vetofruar si kandidat për president të vendit.
PDK-ja ka thënë se vendit i duhet një president dinjitoz dhe se kushdo që kërkon votat e saj, duhet ta ketë parasysh se në paketë shkon edhe kandidati i kësaj partie për president.
Haradinaj po ashtu ka kushtëzuar votat e AAK-së me zgjedhjen e tij president, përndryshe sipas tij, vendi do të shkojë në zgjedhje të reja.
AAK-ja kandidaturën e Haradinajt e ka quajtur sakrificë të tij të radhës për vendin.
“Partia Demokratike e Kosovës nuk shantazhohet dhe as nuk do të lejoj që dikush ta marr peng shtetin e Kosovës. Jemi të gatshëm që të ulemi dhe të bisedojmë me çdo parti politike parlamentare që ta tejkalojmë krizën institucionale në vend dhe ta zgjedhim një president dinjitoz që i shërben unitetit të brendshëm dhe thellon partneritetin me aleatët tonë. Por, PDK-ja nuk do të bëhet palë e një procesi që do të prodhonte një president që thellon përçarjen e brendshme dhe e izolon Kosovën jashtë. Republika jonë është mbi interesat politike dhe egot personale. Kushdo që kërkon votat e deputetëve të PDK-së në Kuvendin e Kosovës, duhet ta kuptoj njëherë e përgjithmonë, që në atë propozim e ka brenda edhe kandidatin e PDK-së”, ka shkruar ushtruesi i detyrës së kryetarit të PDK-së, Enver Hoxhaj, në Facebook.
Ai e ka quajtur të dëmshëm, siç ka thënë barrikadimin pas propozimeve individuale pa filluar një diskutim politik ndërmjet partive parlamentare.
Edhe
Haradinaj s’ka qëndrim për kandidaturën e Osmanit për presidente
Debati mes këtyre dy partive është ndezur ditëve të fundit, pasi Haradinaj ka thënë se ka marrë PDK-në nga opozita dhe e ka sjell në Qeveri dhe se është kritikuar që ka bashkëpunuar, siç ka thënë ai me “hajnat e Prontos”.
Ai i është referuar kohës kur qeveriste koalicioni PAN. E PDK-ja ka thënë se njëherë e ka bërë Haradinajn kryeministër me votat e saj dhe se nuk do t’i japë ato edhe për ta bërë president.
