Pas bojkotimit të mësimit, përmirësohen kushtet në shkollën “Gjon Serreçi” në Ferizaj

Pas bojkotimit të mësimit dhe shqetësimeve të ngritura nga prindërit e nxënësve në shkollën “Gjon Serreçi” në Ferizaj, autoritetet Komunale kanë shqyrtuar kërkesat e tyre dhe e kanë zgjidhur problemin.

Kërkesat e prindërve ishin se në këtë objekt janë kushtet e dobëta për procesin mësimor, pastaj hapësirat e ngushta dhe zhvillimi i mësimit në disa objekte të tjera, ndërkohë që nga e hëna, 2100 nxënës të kësaj shkolla kanë nisur mësimin në një objekt, derisa hapësirat janë zgjeruar duke ua marrë një pjesë të objektit shkollës së mjekësisë.

Nxënësit e shkollës së mjekësisë tashmë janë vendosur në një pjesë të objektit të shkollës “Shaban Hashani”. Drejtori i shkollës “Gjon Serreçi” në Ferizaj ka thënë se deri tash nxënësit e tyre kanë mësuar në tri objekte të ndryshme shkaku i mungesës së hapësirës, kurse që nga sot ata po e zhvillojnë mësimin bashkërisht.

“Janë liruar hapësirat nga shkolla e mjekësisë dhe tash 2100 nxënës i kemi sjell në një objekt dhe tani e kemi më lehtë që t’i menaxhojmë. Komuna i ka pranuar gjatë vikendit shqetësimet tona dhe ka arritur të bën zgjidhje”, ka thënë Heda.

Në anën tjetër nëpërmjet një komunikate Komuna ka njoftuar se është bërë zgjidhje për orarin e mësimit të nxënësve të shkollës "Gjon Serreçi".

“Si rezultat i pakënaqësisë së prindërve me orarin e mësimit në shkollën ‘Gjon Serreçi’, dështimit të ofrimit të zgjidhjes nga menaxhmenti i shkollës, ditëve të fundit, në Drejtorinë e Arsimit, u paraqitën një grup prindërish të nxënësve të shkollës ‘Gjon Serreçi’, me kërkesën e rregullimit të orarit të mësimit dhe kalimit në një pjesë të objektit ku mbante mësim shkolla e mesme e mjekësisë ‘Elena Gjika’. Kjo çështje ndonëse tërësisht e brendshme e që do të duhej të merrte zgjidhje nga drejtuesit e shkollës ‘Gjon Serreçi’, megjithatë pas adresimit në Drejtori të Arsimit, kjo e fundit duke u përfshirë drejtpërdrejt ofroi zgjidhjen, duke mundësuar kalimin e paraleleve të caktuara në objektin ku aktualisht po e shfrytëzon Shkolla e Mesme e Mjekësisë ‘Elena Gjika’”, thuhet në komunikatën e Komunës.

Edhe Arbëri 11 shk 2022 Bojkotohet mësimi në shkollën fillore “Gjon Serreçi” në Ferizaj

Komuna ka kërkuar nga drejtoritë përkatëse të shkollave që të tregohen të përgjegjshme në garantimin e mbarëvajtjes së procesit mësimor.