Partive s’u lejohet të shpenzojnë mbi 950 mijë euro për fushatë

Komisioni Qendror i Zgjedhjeve, të shtunën, në mbledhjen e dytë brenda kësaj jave, ka miratuar rekomandimin e Zyrës për Regjistrimin e Partive Politike dhe Certifikim për kufizimin e shumës, e cila mund të shpenzohet për fushatën e zgjedhjeve komunale. Fiks 950 mijë e 633 euro e 40 centë është shuma që mund të shpenzojnë në total. Për secilën nga komunat që garon është e përcaktuar shifra e parave të cilat mund të shpenzohen nga kjo shumë totale prej gati një milion eurosh. Formula, e cila e rregullon një gjë të tillë, lidhet me numrin e votuesve në këto komuna

Fiks 950 mijë e 633 euro e 40 centë, është shuma të cilën një subjekt politik ka të drejtë ta shpenzojë për fushatën zgjedhore të zgjedhjeve lokale, të cilat këtë vit do të mbahen më 17 tetor. Kjo shumë, e cila ka marrë miratimin e anëtarëve të Komisionit Qendror të Zgjedhjeve, të shtunën, është totali i shpenzimeve të cilat një subjekt politik mundet t’i bëjë për 38 komunat e Kosovës.

E për secilën nga komunat që garon është e përcaktuar shifra e parave të cilat mund të shpenzohen nga kjo shumë totale prej gati një milion eurosh. Formula, e cila e rregullon një gjë të tillë, lidhet me numrin e votuesve në këto komuna. Për komunat të cilat kanë më shumë se 5 mijë votues të regjistruar, secili subjekt politik ka të drejtë të shpenzojë deri në 0.5 euro për secilin prej tyre, derisa në ato që kanë më pak se 5 mijë deri në 0.70 euro.

Nga 38 komunat e Kosovës, nga lista e papërfunduar e votuesve, më pak se 5 mijë banorë kanë Ranillugu me 4.878 votues, Parteshi me 4.561 votues e Kllokoti me 3.692.

Sipas rregullores zgjedhore, e cila kufizon shpenzimet e fushatës dhe deklarimin financiar, dispozita e parë e saj përcakton se “asnjë subjekt politik i certifikuar nuk mund të bëjë tejkalime në shpenzime të fushatës mbi shumën që do të caktohet nga rregulla e KQZ-së, jo më vonë se 5 ditë pas ditës së shpalljes së zgjedhjeve”.

Yll Buleshkaj, drejtor i Zyrës për Regjistrimin e Partive Politike dhe Certifikim(ZRPPC), në mbledhjen e Komisionit Qendror të Zgjedhjeve, të shtunën, ka prezantuar kërkesën për miratim.

Edhe Arbëri 5 maj 2026 KQZ-ja cakton kufirin e shpenzimeve për fushatën zgjedhore

“Për shkak se do të kemi subjekte politike të cilat do të garojnë vetëm në një komunë apo më shumë, por jo të gjitha, atëherë e keni të bashkangjitur dhe tabelën e cila e cek shumën e lejuar të shpenzimeve për secilën komunë. Në qoftë se një subjekt politik, ta zëmë garon vetëm në Junik, do të ketë 2 mijë e 733 euro e 50 centë të lejuara e jo 950 mijë e 633 euro”, ka thënë Buleshkaj, i cili ka shtuar se numri i votuesve mund të ndryshojë më vonë.

Anëtari i Aleancës për Ardhmërinë e Kosovës, Ibrahim Selmanaj, ka kërkuar sqarime nga drejtori i Zyrës për Regjistrimin e Partive Politike dhe Certifikim, se çfarë ndodh nëse një subjekt tejkalon shumën e përcaktuar.

Duke shpjeguar masat që ndërmarrin, Yll Buleshkaj pranoi se deri më tani nuk kanë gjobitur ndonjë subjekt politik lidhur me shpenzimet e bëra, për shkak se siç ka thënë ai, në raportet e prezantuara nuk kanë pasur ndonjë rast të tillë.

“Deri më sot nuk është raportuar që ka tejkaluar dikush shumën edhe pse raportet e organizatave joqeveritare kanë cek që disa subjekte politike e kanë tejkaluar. Por, në raportet të cilat i kemi pranuar, e të cilat i konsiderojmë zyrtare edhe ato që janë audituar deri më 2017 nuk është vërtetuar që ndonjë subjekt politik e ka tejkaluar shumën e lejuar. Kështu që deri më sot nuk është që e kemi penalizuar dikë për tejkalim, sepse nuk kemi pasur argumente për një gjë të tillë”, ka thënë Buleshkaj.

Edhe Arbëri 13 qer 2025 Mbi 16 milionë euro për zgjedhjet lokale, KQZ-ja i kërkon qeverisë buxhet shtesë

Komisioni Qendror i Zgjedhjeve ka miratuar, po ashtu, rekomandimin e Zyrës për Regjistrimin e Partive Politike dhe Certifikim për të gjobitur Nismën Socialdemokrate me 350 euro për mosdorëzimin e dokumentacionit pas mbajtjes së Kuvendit Zgjedhor. Pagesa e kësaj gjobe duhet të bëhet para certifikimit të partisë, për shkak se në të kundërtën nëse një gjë e tillë nuk ndodh atëherë rrezikon pjesëmarrjen në zgjedhjet lokale.

Sipas planit operacional të Komisionit Qendror të Zgjedhjeve, fushata zgjedhore për zgjedhjet komunale, e cila do të zgjasë 30 ditë, do të fillojë më 16 shtator, e do të përfundojë më 15 tetor. Kurse, afati për aplikim të subjekteve politike për t’u certifikuar për pjesëmarrje në zgjedhje fillon më 17 qershor dhe përfundon më 16 gusht.