Dorëheqja e kreut të Qeverisë, Ramush Haradinaj, e ka vështirësuar edhe më shumë situatën rreth bisedimeve mes Kosovës dhe Serbisë.
Të dyja vendet, që nga viti i kaluar, përkundër tentimeve, kanë dështuar që të ulen dhe të vazhdojnë bisedimet për arritjen e një marrëveshjeje përfundimtare, raporton KTV.
Për partitë në vend, prioritet në këtë kohë, janë zgjedhjet dhe jo dialogu mes Kosovës dhe Serbisë.
Vjosa Osmani nga LDK-ja, e ka quajtur të papranueshëm vazhdimin e bisedimeve mes dy vendeve në këtë kohë, derisa edhe PDK-ja prioritet i ka zgjedhjet e parakohshme.
Kurse, Partia Socialdemokrate, zgjedhjet i konsideron mundësi të zhbllokimit të cilitdo proces.
Edhe
Partitë politike, të interesuara për zgjedhje, jo për dialogun me Serbinë
Por, funksionalizimi i institucioneve nuk është kushti i vetëm që të vazhdohet dialogu Kosovë-Serbi.
Sipas Jeta Krasniqit nga KDI-ja, lidhur me këtë çështje duhet të arrihet edhe konsensus politik.
Në anën tjetër, Bashkimi Evropian, insiston se mënyra e vetme e rinisjes së bisedimeve është pezullimi i taksës ndaj produkteve serbe dhe boshnjake.
“BE-ja, së bashku me të gjitha shtetet anëtare dhe SHBA-ja, i bën thirrje qeverisë së Kosovës që të pezullojë tarifat menjëherë, për të lejuar rifillimin e shpejtë të Dialogut. Serbia është gjithashtu përgjegjëse për të mbajtur një mjedis të favorshëm për rifillimin e plotë të bisedimeve të Dialogut”, thuhet në një përgjigje të Zyrës për Media të BE-së.
Edhe
Dialogu Kosovë-Serbi, ndërmjet ndryshimeve politike dhe zgjedhjeve të reja
Takimi mes liderëve të Kosovës dhe Serbisë, ishte i planifikuar që të mbahej në fillim të korrikut në Paris, mirëpo i njëjti kishte dështuar.
Ky takim ishte nismë e kancelares gjermane Angela Merkel, dhe presidentit francez Emmanuel Macron, pas Samitit të Berlinit, të mbajtur muaj më parë.
