Paralajmërohet “përgjigje e shpejtë dhe e duhur” e Qeverisë për rastin e hulumtuar nga KOHA

Jeton Zulfaj, këshilltar i kryeministrit Albin Kurti, ka paralajmëruar ndërmarrje të veprimeve nga ana e Qeverisë dhe institucioneve shëndetësore, pas hulumtimit të KOHËS për abuzimet me programin për trajtim jashtë vendit të të sëmurëve rëndë.

Deri tash Qeveria dhe institucionet tjera kanë heshtur pavarësisht publikimeve që shpërfaqin dyshimet për keqpërdorimin e miliona eurove të shtetit.

KOHA ka nisur qe më shumë se një javë publikimin e serisë së hulumtimit për abuzimet me këtë program. Hulumtimi disamujor ka ngritur dyshime për keqmenaxhim e humbje të madhe të parasë në kurriz të pacientëve të sëmurë rëndë, e që s’gjejnë shërim në Kosovë. Hulumtimi zbardh raste kur faturat që vijnë nga spitalet, kryesisht në Turqi, janë më të shtrenjta se profaturat. Familjet e pacientëve në shumicën e rasteve s’kanë qasje në fatura. Ka raste kur familjarë të pacientëve rrëfejnë për keqpërdorime e se si s’i kanë marrë trajtimet për të cilat shteti mori obligim e se si kanë paguar mjete shtesë për trajtim. Dy agjenci, nga rreth 10 sa lëshojnë profatura, janë nën pronësi të një personi të akuzuar për korrupsion. E borxhi i përgjithshëm mbahet fshehtë. Teksa Fondi në përgjigje zyrtare thotë se është më pak se 2 milionë euro, Qeveria thotë se është afër 10, Bordi Ekzekutiv në fund të vitit të kaluar ka përmendur shifrën prej 28 milionë eurove.

Në “Interaktiv” të KTV-së, Zulfaj ka thënë se publikimet po analizohen dhe “çdo abuzim e keqpërdorim është i papranueshëm dhe nuk zë vend fare në Qeverinë Kurti”.

“Ne jemi demokraci që po lulëzon. Media është kritike e jetike në funksionalizimin e demokracisë dhe mbajtjes përgjegjës të Qeverisë, sidomos në llogaridhënie karshi qytetarëve dhe jam i bindur që kjo çështje do të marrë përgjigjen e duhur nga Qeveria... Jam i bindur se të gjitha hulumtimet e KOHËS janë duke u shikuar dhe duke u analizuar për të parë kontekstin dhe të parë se kush duhet të thirret në llogaridhënie dhe jam i bindur se institucionet përkatëse të shëndetësisë dhe Qeveria do të dalin me përgjigjen e duhur shumë shpejt”, ka thënë ai.

Zulfaj ka thënë se Qeveria i ka parë me shqetësim raportimet, ndërsa ka shtuar se “përgjigja e cila duhet të vijë nga Qeveria duhet të jetë e mirëinformuar, duke gjetur akterët përkatës në mënyrë që edhe përgjegjësia e tyre të jetë në përputhje me dëmet që i kanë bërë”.