Paralajmërohen protesta më të mëdha nëse nuk lirohen ndërtesat komunale deri nesër

Protestuesit serbë lokalë në Zveçan kanë paralajmëruar protestë më të madhe nëse Policia e Kosovës dhe KFOR-i nuk largohen deri të mërkurën nga objektet komunale.

Këtë e bëri të ditur gazetarja e KOHËS, Saranda Ramaj, e cila gjatë tërë ditës ka ndjekur zhvillimet nga afër në këtë komunë.

“Që nga fillimi i ditës, protestuesit kanë dalë me deklarata të rrejshme, fillimisht kanë thënë se janë në negociata me KFOR-in dhe se tashmë është çështje e kryer një marrëveshje që do të bëhej publike në orën 15:00 e pjesë e marrëveshjes do të ishte edhe negocimi për amnistimin e atyre që u arrestuan dje për lëndimin e dhjetëra pjesëtarëve të KFOR-it, por një gjë e tillë pastaj politikanët që kanë qenë të pranishëm si Goran Rakiq dhe të tjerë, kanë thënë se një gjë e tillë është deklaruar në këtë mënyrë vetëm për të mbajtur moralin e protestuesve. Pak para orës 16:00 ata kanë dalë dhe kanë thënë se nuk ka një marrëveshje të tillë, por se po japin kohë Policisë së Kosovës dhe KFOR-it që t’i lirojnë institucionet komunale deri në ditën e nesërme. Nëse një gjë e tillë nuk ndodh sipas tyre, protesta do të jetë më e madhe”, ka thënë.

Ajo më tej ka bërë të ditur se të martën protesta në këtë komunë ka qenë kryesisht e qetë dhe me një numër jo të madh të protestuesve.