Pa PDK-në, Kryesia e Kuvendit vendos se do të jenë 14 komisione parlamentare

Pas braktisjes së seancës së 3 shkurtit, në kohën kur u votua Qeveria e re, Partia Demokratike e Kosovës ka bojkotuar edhe mbledhjen e Kryesisë së Kuvendit.

Shefi i deputetëve të PDK-së, Bedri Hamza, ka thënë se këtë vendim e kanë marrë pasi u hoq fotografia e presidentit Hashim Thaçi nga zyra e kryeparlamentares Vjosa Osmani, raporton KTV.

Këtë bojkotim të PDK-së, kryeparlamentarja Vjosa Osmani e cilëson të panevojshëm, ngase thotë se fotografia vetëm është zhvendosur brenda zyrës.

Megjithatë, pa pjesëmarrjen e PDK-së, Kryesia e Kuvendit ka vendosur që legjislatura e 7-të e Kuvendit t’i ketë 14 komisione parlamentare.

Por, për ndarjen e tyre do të pritet deri të hënën, pasi që Kuvendi do të ketë edhe disa deputetë të rinj, meqë disa kanë marrë poste në ekzekutiv.

Kryeparlamentarja Osmani ka thënë se i takon Qeverisë se a do ta bëjë zgjatjen buxhetore, apo do të sjellë në rend dite projektligjin për buxhetin e vitit 2020.