-
Nga:
Majlinda Ibrahimi
- 23 tetor 2022 14:03
- Shpërndaje në:
Presidentja e Kosovës, Vjosa Osmani, në konferencë të përbashkët për media me presidentin e Maltës, George Vella, është pyetur për çështjen e targave.
Më 31 tetor përfundon afati për konvertimin e targave nga ato ilegale të kohës së Millosheviqit për në targa legale të Kosovës.
Nga ndërkombëtarët ka pasur kërkesë për shtyrje të afatit, por Osmani ka thënë se çështja e targave është çështje e sundimit e ligjit. Ajo ka thënë se partnerët ndërkombëtarë duhet adresojnë presionin te Serbia, që është burim i tensioneve.
“Çështja e targave mbi të gjitha është çështje sundimit të ligjit. Mbi 90 për qind e serbëve që jetojnë në Kosovë, tashmë i kanë konvertuar targat e së kaluarës për në targa të ligjshme. E kanë respektuar ligjin dhe kanë kontribuuar në sundim të ligjit e trajtim të barabartë të të gjithëve. Sa i përket një pakice të vogël që nuk i ka konvertuar akoma targat e i shfrytëzojnë ato të kohës së Millosheviqit, kërkesa jonë është të respektohet ligji. Ka pasur mjaftueshëm kohë të bëhet konvertimi. Kjo kërkesë është përputhje të plotë me legjislacionin vendor dhe me praktika ndërkombëtare. Imagjinoni sikur në një shtet ta zëmë si Polonia, 25 vjet pas luftës të kishit parë targa të Hitlerit”, ka thënë Osmani.
Ajo ka thënë se bandat ilegale në veri nuk po lënë serbët të konvertojnë targat e veturave për në ato të Kosovës.
“Duhet t’i jepet fund ndikimit të bandave kriminale që i kërcënojnë qytetarët tanë serbë. Çdoherë kur ata dëshirojnë t’i regjistrojnë veturat në targa të ligjshme të Kosovës, kërcënohen me djegie shtëpie apo të veturave. Është përfundimisht kjo çështje e sundimit të ligjit. Nëse një kërkesë ka qenë konsistente në këto 20 vjet të fundit nga partnerët tanë ndërkombëtarë, është se Kosova duhet të punojë në sundim të ligjit. Këtë po e bëjmë, asgjë tjetër. Presim përkrahje të plotë të na ndihmojnë në sundim të ligjit. Të trajtohen gjitha palët barabartë. Asnjë veprim nuk është kundër serbëve”, ka thënë Osmani. Veprimet e institucioneve të Kosovës asnjëherë nuk kanë kontribuuar për tension. Frikësimet, kërcënimet e djegiet e makinave po bëhen nga strukturat ilegale që po mbështeten nga Vuçiqi. Fokusi të jetë te burimi i tensioneve e dhunës, ai burim nuk ka qenë e nuk është në Kosovë. Ka qenë gjithmonë në Serbi, aty duhet drejtuar presioni”.
