Osmani nuk do ta përkrahë Projektligjin për rimëkëmbje nëse nuk merren parasysh vërejtjet e opozitës

Pas gjashtë dështimesh, të hënën është miratuar në parim Projektligji për rimëkëmbje ekonomike. Kjo u bë në seancën e jashtëzakonshme të thirrur nga Grupi Parlamentar i LDK-së, mbështetur nga 62 deputetë nënshkrues. Edhe pse seanca ishte paraparë që të fillonte në orën 10:00, menjëherë u kërkua gjysmë ore pauzë pasi në sallë ishin vetëm 40 deputetë.

Ndërkohë, me ndihmën edhe të votave nga dy deputetët e AKR-së, që nuk janë në Qeveri, u siguruan 64 vota për ta kaluar në parim këtë projektligj. Në votim nuk morën pjesë partitë opozitare, Lëvizja Vetëvendosje dhe PDK-ja, me arsyetimin se ky projektligj nuk përmbush kërkesat e bizneseve dhe nuk përkon asgjë me rimëkëmbjen ekonomike.

Ndërkohë, kryetarja e Kuvendit, Vjosa Osmani, ka thënë se nëse Qeveria nuk bashkëpunon me opozitën nuk do ta ketë përkrahjen e saj për kalimin e këtij projektligji në lexim të dytë, shkruan KOHA Ditore.

Në fillim të seancës, shefi i Grupit Parlamentar të LDK-së, Arben Gashi, ka kërkuar nga deputetët e opozitës që të votojnë për kalimin e këtij projektligji.

Por, deputeti i Vetëvendosjes, Hekuran Murati, ka thënë se partia e tij vazhdon të mbajë qëndrimin e njëjtë dhe se emërtimi i projektligjit nuk përkon me përmbajtjen.

Edhe Video 4 dhj 2020 Në përpjekjen e tetë, me 72 vota miratohet Projektligji për rimëkëmbje ekonomike

“Ne jemi për ta ruajtur shtetin, për t’i ruajtur institucionet, nuk mendojmë se kjo bën zgjidhje pasi, siç është cekur edhe nga Zyra ligjore, emërtimi i këtij projektligji nuk përkon me përmbajtje”, ka thënë ai.

Edhe deputeti i PDK-së, Abelard Tahiri, ka theksuar se ky propozim që kanë para vetes nuk mund të quhet pako e rimëkëmbjes.

“Ky propozim që e kemi paraparë gjithçka mund të quhet vetëm jo pako për rimëkëmbje ekonomike. PDK-ja nuk ndryshon qëndrimin nga hera e kaluar. Ne do të përmbahemi nga votimi. Me votimin e tij do t’i shkaktojmë dëme të mëdha vendit. Unë jam që të ulemi dhe të bëjmë një pako për rimëkëmbje, jo si kjo që e kemi”, ka theksuar ai.

Ndërkohë, kryetarja e Kuvendit, Vjosa Osmani, ka kritikuar Qeverinë për mosbashkëpunim. Ajo ka thënë se kryeministri asnjëherë nuk e ka ftuar atë për të bashkëpunuar për të kaluar këtë projektligj. Madje, siç ka thënë ajo, ai nuk ka shprehur as interesimin e tij për kalimin e këtij projektligji pasi, sipas saj, Hoti nuk ka qenë prezent as në kohën kur është trajtuar ky projektligj.

Edhe Arbëri 2 dhj 2020 PDK-ja do ta votojë Projektligjin për rimëkëmbje, seanca të premten

“Ajo që duhet të ndodhë është kjo: të kalojë në leximin e parë, mirëpo në qoftë se Qeveria nuk bën përpjekje që të ulet bashkë me të gjithë anëtarët e opozitës dhe ta ndryshojë këtë projektligj në mënyrë që t’i marrë votat në leximin e dytë, natyrisht që as përkrahjen time nuk do ta ketë, e jam e bindur se as të disa deputetëve të tjerë në leximin e dytë”, ka theksuar ajo.

Votimit i parapriu një debat mes kryeparlamentares Vjosa Osmani dhe shefit të Grupit Parlamentar të LDK-së, Arben Gashi, me kryeparlamentaren, që u ankua se s’është kontaktuar fare nga Qeveria për projektligjin. Ajo konfirmoi votën pro, teksa po ashtu kërkoi nga pushtetarët që në mes të dy leximeve të merren parasysh edhe vërejtjet e opozitës.