Osmani: E nevojshme që autorët e aktit të agresionit të 24 shtatorit të vihen para përgjegjësisë

Presidentja e Kosovës, Vjosa Osmani, edhe një herë ka ritheksuar se është e nevojshëm që autorët e sulmit të 24 shtatorit në Banjskë të Zveçanit, të vihen para përgjegjësisë.

Këtë herë Osmani këtë e ka thënë në takimin që të mërkurën e ka zhvilluar me ambasadoren e re jorezidente të Kanadasë në Kosovë, Jessica Blitt, me rastin e dorëzimit të letrave kredenciale.

Presidentja në këtë takim thuhet se ka potencuar edhe rëndësinë e bashkëpunimit më aleatë.

“Presidentja e njoftoi Ambasadoren Blitt edhe për zhvillimet e fundit në fushën e sigurisë në vend, me ç’rast potencoi rëndësinë e madhe të vazhdimit të bashkëpunimit me aleatë, si dhe nevojën për të vënë autorët e aktit të agresionit të 24 shtatorit para përgjegjësisë, thuhet në komunikatën e Presidencës.

Në këtë takim, thuhet se është konfirmuar gatishmëria për hapjen e kapitujve të rinj të bashkëpunimit, si dhe angazhimi i përbashkët i avancimit të Agjendës për Gratë, Paqen dhe Sigurinë.

“Presidentja Osmani e uroi ambasadoren për detyrën dhe shprehu mirënjohje të thellë për mbështetjen e Kanadasë për Kosovën dhe bashkëpunimin e shkëlqyeshëm. Ndërkaq, ambasadorja Blitt, shtoi se nga ana e saj do të ketë edhe angazhim më të madh në fusha të ndryshme të interesit të përbashkët për të dy shtetet sidomos në çështjet që kanë të bëjnë me fuqizimin e grave dhe barazinë gjinore”, thuhet në komunikatë.