-
Nga:
Vlerë Mehmeti
- 18 prill 2026 21:00
- Shpërndaje në:
Nuk është mbajtur mbledhja e Komisionit Parlamentar për Shëndetësi, në agjendë të së cilës ka qenë edhe raportimi i anëtarëve të Bordit të SHSKUK-së dhe drejtorit të përgjithshëm. Deputetë opozitarë kritikuan Vetëvendosjen dhe thanë se synon ta shmangë menaxhmentin e SHSKUK-së nga përgjegjësia.
Ikje nga përgjegjësia dhe llogaridhënia e kanë cilësuar deputetët opozitarë mosmbajtjen e mbledhjes së kësaj të marte të Komisionit Parlamentar për Shëndetësi, në të cilën ishte paraparë raportimi i anëtarëve të Bordit Drejtues dhe i drejtorit të përgjithshëm të Shërbimit Spitalor Klinik Universitar.
Deputetë opozitarë theksojnë se mbledhja u anulua pa asnjë sqarim apo njoftim paraprak nga deputeti i Vetëvendosjes, Haxhi Avdyli, që është kryetar i komisionit.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Askush nga partitë opozitare shqiptare nuk e ka kuptu se pse është shty raportimi në Komision, dhe ne kemi kërkuar menjëherë përmes email-eve sqarim dhe po ashtu kemi kërkuar që sa më shpejt kjo çështje të vjen në rend të ditës”, ka thënë
Artan Behrami, deputet i PDK-së.
Ndërsa, Armend Zemaj, deputet i LDK-së e ka vlerësuar të domosdoshëm raportimin, për më tepër që sipas tij ka dyshime për degradim të këtij sektori.
“Këta tentojnë të ikin nga përgjegjësia e raportimit dhe të minimizojnë rolin mbikëqyrës që ka Kuvendi i Republikës së Kosovës. Ne kemi interesim që të dëgjojmë prej Bordit të SHSKUK-së po ashtu edhe prej drejtorit për gjendjen, për ankesat dhe mbi të gjitha për dyshimet që ka degradim total në këtë sektor, në kuptimin në plotin”, ka theksuar Zemaj.
E, kryetari i Komisionit, Haxhi Avdyli, nuk ka treguar arsyet e anulimit të mbledhjes, por ka paralajmëruar se ajo do të mbahet brenda muajit prill.
“Mbledhja e radhës e komisionit që do mbahet të hënën e ka në rend dite miratimin në lexim të dytë të Ligjit për Sigurime shoqërore, e në mbledhjen e radhës, që do të mbahet brenda muajit prill, do të ketë raportim të bartësve të institucioneve shëndetësore”, ka thënë Avdyli.
Bordi Drejtues i SHSKUK-së përfundon mandatin më 26 prill. Avdyli nuk është përgjigjur në pyetjen nëse mbledhja, ku është paraparë raportimi i anëtarëve, do të mbahet para kësaj date.
Këtë garanci nuk e dha as anëtari tjetër i komisionit nga radhët e Vetëvendosjes, Fitim Haziri, i cili arsyetoi edhe mosmbajtjen e mbledhjes.
“Disa prej anëtarëve të komisionit funksional të shëndetësisë jemi anëtarë të komisionit ad hoc për intervistimin e kandidatëve për RTK dhe KPM. Për RTK i kemi përfunduar, tash i kemi intervistat për komisionin e pavarur të mediave dhe kjo varet prej kohës... momentin që krijohet mundësia dhe koha ne do ta thërrasim në raportim”, është arsyetuar Haziri.
Vetëm Haziri dhe deputeti i LDK-së, Zemaj, janë pjesë edhe e komisioneve ad hoc. Edhe pa ta nuk do të cenohej kuorumi në Komisionin parlamentar për shëndetësi.