Opozita e shoqëria civile i vlerësojnë elektorale e të jashtëligjshme vendimet për pensione e shtesa

Miratimi i buxhetit dhe vendimet për rritje pensionesh e shtesash janë kontestuar nga përfaqësues të opozitës dhe të shoqërisë civile. Ata vlerësuan se me vendime synohet ndikimi në zgjedhjet e balotazhit dhe në ato parlamentare, që pritet të shpallen.

Vendimet e fundit të Qeverisë në detyrë për rritje pagash, pensionesh e shtesash për fëmijë, janë cilësuar nga përfaqësues të opozitës si mashtrime dhe përpjekje për blerje votash në prag të zgjedhjeve.

Kryetari i PDK-së, Memli Krasniqi, akuzoi kryeministrin në detyrë, Albin Kurti, se po tenton që në prag të balotazhit për zgjedhje lokale e afër zgjedhjeve të parakohshme parlamentare të sigurojë më shumë vota me vendimet që i mori në Qeveri.

“Thesi i mashtrimeve të një “babadimri” që kurrë s’erdhi për qytetarët e Kosovës, sado që premtoi çdo vit për pesë vjet, s’mundet ta rikthejë besimin e humbur të qytetarëve e as nuk mund të arrijë qëllimin e blerjes së votës për balotazh dhe për zgjedhje parlamentare. Krejt ato që sot u thanë në mbledhjen e fundit të kësaj qeverie, e që s’u bënë pesë vjet me radhë, do të bëhen: më mirë, më shumë e më shpejt, por me qeverinë e ardhshme, pa Albin Kurtin e pa Vetëvendosjen”, tha Krasniqi.

Në këtë mbledhje, Qeveria në detyrë miratoi edhe buxhetin për vitin 2026 në vlerë të 4 miliardë eurove.

Deputetja e LDK-së, Hykmete Bajrami, e akuzoi qeverinë për abuzim dhe theksoi se vendimet u morën për qëllime elektorale.

“Grupi Parlamentar i Vetëvendosjes që ka uzurpuar zyrat e Qeverisë aprovoi sot buxhetin për vitin 2026. Ka mundësi që buxheti i vitit 2026 të shkojë në 8 miliardë e pagat e pensionet të rriten disafish në kohën kur pritet vendimi për shpalljen e zgjedhjeve të jashtëzakonshme”, deklaroi deputetja e LDK-së.

Pos opozitës, kanë reaguar edhe organizata të shoqërisë civile.

Në reagimin e Institutit të Kosovës për Drejtësi thuhet se, përveçse janë elektorale, vendimet janë miratuar nga një përbërje e qeverisë, që sipas Gjykatës Supreme është në papajtueshmëri me Kushtetutën dhe Ligjin, meqë mbajnë pozitat e deputetëve.

“Të gjithë anëtarët e qeverisë, të cilët janë certifikuar si deputet, nuk janë më anëtarë të qeverisë dhe nuk kanë asnjë kompetencë për të marrë asnjë vendim. Për këtë arsye, të njëjtit kanë uzurpuar zyrat e Qeverisë dhe rrjedhimisht të gjitha këto vendime, në mungesë të kompetencës, janë të kundërligjshme”, thuhet në reagim të IKD-së.

Duke përmendur të njëjtën arsye, edhe Instituti GAP e vlerësoi të kundërligjshëm vendimin për miratimin e buxhetit të vitit të ardhshëm.

“Që ky proces të jetë i ligjshëm, ka qenë e domosdoshme që nënshkruesit e këtij projektligji të jenë në përputhje të plotë me legjislacionin e lartcekur, dhe propozuesit të jenë zv.kryeministri dhe ministra e zv.ministra përkatës që nuk kanë fituar njëkohësisht pozitën e deputetit në këtë legjislaturë. Çdo veprim që e anashkalon këtë parim cenon vlefshmërinë e vetë ligjit për buxhetin, situatë që ndodhi sot”, thuhet në reagimin e GAP-it.

Pavarësisht këtyre interpretimeve, kryeministri në detyrë, Albin Kurti, tha në Qeveri se vendimet dhe miratimi i buxhetit u bënë duke respektuar obligimet ligjore që shteti të mos mbesë pa buxhet.