Njohësit i vlerësojnë me peshë të madhe dëshmitarët e mbrojtjes

Deklaratat përfundimtare në rastin më të madh të Gjykatës Speciale pritet të jepen në shkurt të vitit 2026. E po në 2026-n pritet të shpallet aktgjykimi i parë për këtë rast. Njohësit e fushës së drejtësisë vlerësojnë se deklaratat e dëshmitarëve të mbrojtjes do të kenë peshë të madhe në vlerësimin e Gjykatës Speciale

Peshë të madhe në vlerësimin e Dhomave të Specializuara në rastin më të madh të kësaj gjykate do të kenë deklaratat e dëshmitarëve të mbrojtjes, kanë vlerësuar njohësit e kësaj fushe.

Megjithatë juristi i Fondit për të Drejtën Humanitare, Amer Alija, ka thënë se pavarësisht peshës së tyre, dëshmitë e dëshmitarëve të mbrojtjes nuk treguan konkretisht për rolin e secilit nga të akuzuarit: Hashim Thaçi, Kadri Veseli, Rexhep Selimi e Jakup Krasniqi.  

“Mbrojtja përmes këtyre deklaratave, të cilat do të kenë një peshë të madhe tek vlerësimi i kredibilitetit nga trupi gjykues kanë dashur të tregonin të kundërtën nga çka ato që ka pretenduar prokuroria. Deklaratat e këtyre dëshmitarëve të cilët kanë qenë të kyçur drejtpërdrejt me zhvillime gjatë viteve 98’, 99’ sigurisht që do të kenë peshë dhe njohuritë dhe deklaratat e tyre lidhur me organizimin e UÇK-së lidhur me përgjegjësitë dhe jopërgjegjësitë e Hashim Thaçit dhe të tjerëve do të vlerësohen nga trupi gjykues”, ka thënë Alija.

E drejtori i Institutit të Kosovës për Drejtësi, Ehat Miftaraj, vlerëson se dëshmitarët e mbrojtjes e rrënuan teorinë e prokurorisë. 

“Ka pasur një përfaqësim të aktakuzës shumë të dobët e cila pastaj në raste të caktuara kualiteti i dobët i aktakuzës është munduar të kompensohet me një qasje agresive nga ana e prokurorëve. Kualiteti, integriteti, kredibiliteti i dëshmitarëve të ZPS ka qenë i nivelit shumë të ulët në raport me kredibilitetin, integritetin e dëshmitarëve të mbrojtjes...Dëshmitarët e mbrojtjes e shkatërruan narrativen që ka ndërtuar Prokuroria Speciale lidhur me atë se kush e ka udhëhequr UÇK-në, në këtë rast Prokuroria e ka quajtur Hashim Thaçin si komandant të UÇK-së”, ka thënë Miftaraj.
Fjalët përfundimtare të palëve në këtë rast do të paraqiten nga 9 deri 13 shkurt 2026.

Më pas trupi gjykues i Themelores së Speciales ka tre muaj kohë për ta shpallur aktgjykimin, porse ky afat mund të zgjatet për dy muaj të tjerë me lejen e kryetares së gjykatës.

Në Hagë, në atë që njihet edhe si Gjykata Speciale, po zhvillohet procesi gjyqësor kundër Thaçit dhe tre ish-eprorëve të tjerë të UÇK-së: Jakup Krasniqi, Kadri Veseli dhe Rexhep Selimi.

Ata janë në paraburgim që nga nëntori i vitit 2020, ndërkaq gjykimi ndaj tyre nisi në prillin e 2023-tës.

Aktakuza, e cila i ngarkon ata për përgjegjësi “personale”, por edhe për “krimet e kryera nga vartësit e tyre”, synon t’i nxjerrë fajtorë për krime kundër njerëzimit dhe për krime lufte, përfshirë vrasjen e më shumë se 100 viktimave, si dhe për mbajtjen në paraburgim në mënyrë të paligjshme dhe për torturimin e qindra viktimave.

Gjykata Speciale, e themeluar në vitin 2015 nga Kuvendi i Kosovës, heton krimet e pretenduara të pjesëtarëve të UÇK-së, të kryera kundër pakicave etnike dhe rivalëve politikë, nga janari i 1998-s deri në dhjetor të vitit 2000.

Thaçi, ish-president i Kosovës; Veseli e Krasniqi, ish-kryeparlamentarë; dhe Selimi, ish-deputet, janë deklaruar të pafajshëm për akuzat.

Gjatë luftës në Kosovë, Thaçi mbante rolin e udhëheqësit politik të UÇK-së, Veseli ishte udhëheqës i shërbimit të inteligjencës, Krasniqi zëdhënës, ndërsa Selimi anëtar i Shtabit të Përgjithshëm.