Kryetari i Nismës Socialdemokrate, Fatmir Limaj, ka thënë se nëse partia e tij e kalon pragun, e për të cilin është i bindur se do të ndodhë në zgjedhjet e parakohshme më 28 dhjetor, atëherë në Parlamentin e Kosovës do të arrijë bashkimin me grupin parlamentar të Partisë Demokratike të Kosovës.
Ai ka thënë se këtë bashkim ia kanë kërkuar shumë.
"Sonte po e them para jush, ju që e doni bashkimin, dua publikisht ta them fjalën, Nisma garon në zgjedhje me 110 burra e gra, familjarë të dëshmorëve, intelektualë, gra e burra që kanë vetëm një synim për t’i dhënë një ndryshim Kosovës, qeverisjes dhe bashkimit të madh. Me deputetët e NISMA në Parlamentin e Kosovës, unë sonte do ta jap premtimin dhe ai është ky - nëse Nisma do të jetë në Parlament, me grupin e vet parlamentar do t’i bashkohemi bashkimit me gjithë ata që kanë kërkuar bashkimin me grupin parlamentar të PDK-së...Dikush e pamundësoi bashkimin, por askush s’mund të ma ndalë të bashkohemi në Parlament me një grup të fuqishëm parlamentar, grup i cili do ta ndryshojë qeverisjen”, tha Limaj në konferencë për media.
Ai ka thënë se NISMA me 15 mijë vota më tepër se që i ka do të ketë 6 deputetë.
Limaj ka thënë se NISMA do të garojë me 110 kandidatë dhe thotë se ndryshimi është i nevojshëm.
"Kryeministri i ardhshëm duhet të jetë nga opozita", tha Limaj. "Qeverisja ndryshon vetëm nëse NISMA futet në Parlament e formohet ai grupi i madh parlamentar i PDK-së".