Me afrimin e zgjedhjeve të parakohshme të 28 dhjetorit, në disa organizata të shoqërisë civile janë kanë ngritur shqetësime për veprime që mund të ndikojnë në proces. Drejtori Ekzekutiv i Qendrës Kosovare për Studime të Sigurisë, Mentor Vrajolli, paralajmëron për ndërhyrjet nga Serbia, ndërsa Instituti i Kosovës për Drejtësi ka kontestuar planin për hapjen e qendrave të votimit jashtë përfaqësive diplomatike, ku planifikohet të votojnë shtetasit që jetojnë jashtë vendit
Një muaj para zgjedhjeve parlamentare të parakohshme, janë shprehur brenga për veprime që mund ta dëmtojnë procesin.
Drejtori Ekzekutiv i Qendrës Kosovare për Studime të Sigurisë (QKSS), Mentor Vrajolli, ka paralajmëruar se tendencat për manipulim të zgjedhjeve, veçanërisht nga Serbia, përbëjnë kërcënim serioz për proceset demokratike në vend.
“Tendencat për manipulim, sidomos nga Serbia, tashmë janë evidente. Duket qartë se një parti fiton të gjitha votat dhe kjo parti është e lidhur me pushtetin në Serbi. Kjo pengon pluralizmin dhe mundësinë e krijimit të subjekteve të pavarura politike”, ka thënë Vrajolli.
E, nëpërmjet një reagimi, Instituti i Kosovës për Drejtësi (IKD) ka shprehur dronë nga një vendim i Komisionit Qendror të Zgjedhjeve, i cili mundëson që, krahas ambasadave e konsullatave diplomatike jashtë vendit, të mund të votohet edhe në 10 lokacione të tjera, ku është paraparë të hapen qendra të votimit për mërgimtarët.
Sipas këtij instituti, vendimi është në kundërshtim me Ligjin për Zgjedhjet dhe me rregullat zgjedhore.
“IKD bën thirrje që KQZ të ndërpresë veprimet që bien ndesh me ligjin dhe rregullat zgjedhore. Respektimi i ligjit përbën themelet e integritetit zgjedhor dhe të funksionimit demokratik të institucioneve. Prandaj, KQZ ka detyrim që brenda mandatit të saj të përcaktuar me ligj, të sigurojë që proceset zgjedhore të jenë plotësisht të ligjshme dhe të besueshme”, thuhet në reagimin e IKD-së.
Një tjetër çështje për të cilën është kërkuar reflektim nga politikanët, ka të bëjë me gjuhën që ata përdorin.
Mentor Vrajolli tha për Ekonomia Online se ka mungesë të vullnetit politik për të luftuar seriozisht dezinformimin dhe theksoi nevojën që partitë t’i bazojnë fushatat në plane dhe programe reale, jo në manipulime dhe lajme të rreme.
“Janë duke përfituar të gjithë dhe mendoj që më tepër është ajo droja nëse dikush po i shfrytëzon më mirë sesa dikush tjetër platformat e dezinformimit sesa dëmi i përgjithshëm që shkaktohet. Kështu që, nuk duket se ka ndonjë tendencë apo iniciativë serioze nga cilado palë të luftohet dezinformata”, ka thënë Vrajolli.
Zgjedhjet e parakohshme parlamentare do të organizohen më 28 dhjetor. Ato u shpallën meqë, pas zgjedhjeve të shkurtit asnjë nga dy të mandatuarit për ta bërë qeverinë, nuk arritën të sigurojnë votat e mjaftueshme në Kuvend.