Në qershor përcaktohet fati i vettingut

Një delegacion i Komisionit të Venecias i ka takuar të premten krerët e institucioneve në Kosovë. Në takime të ndara me presidenten Vjosa Osmani, e kryetarin e Kuvendit, Glauk Konjufca, është diskutuar në lidhje me procesin e vettingut. Muaj më parë, ky institucion ka dalë me draft-opinion e që përmbajtja e tij qartazi tregon që nuk e përkrah procesin e vettingut. Megjithatë, opinioni final pritet të prezantohet në muajin qershor.

Kanë mbetur pak javë para se Komisioni i Venecias të lëshojë opinion në lidhje me planet e Qeverisë së Kosovës për vettingun në drejtësi.

Draft-opinioni i parë i Komisionit të Venecias qartazi nuk e shihte si zgjidhje vettingun.

Pak kohë para se Komisioni i Venecias të dalë me opinion, dy zyrtarë të këtij institucioni, raportuesja Grainne McMorrow, zëvendëssekretari Schnutz Dürr, si dhe shefi i Zyrës së Këshillit të Evropës në Kosovë, Frank Power, kanë zhvilluar takime me krerët e institucioneve të Kosovës.

Ata janë takuar me presidenten Vjosa Osmani. Nëpërmjet një komunikate për media, Osmani ka njoftuar që temë diskutimi ka qenë edhe procesi i vettingut.

“Presidentja Osmani theksoi se një proces i mirëfilltë dhe profesional i vettingut është jetik për ta forcuar sundimin e ligjit, si dhe për të garantuar integritetin, efikasitetin dhe profesionalizmin e sistemit të drejtësisë. Si i tillë, procesi i vettingut ka për synim forcimin e cilësisë së sistemit të drejtësisë, i cili ndikon drejtpërdrejt në përmirësimin e jetës së qytetarëve të Republikës së Kosovës”, thuhet në komunikatën e Presidencës.

Delegacioni i Komisionit të Venecias u takua edhe me kryetarin e Kuvendit të Kosovës, Glauk Konjufca. Vettingu ishte temë e diskutimit edhe në këtë takim.

“Në takim, ndër të tjera, u diskutua për reformën në drejtësi, me theks të veçantë në procesin e vettingut dhe rëndësinë e këtij procesi për sundimin e ligjit dhe shtetit të së drejtës. Kryetari Konjufca, duke e konsideruar procesin e vettingut si thelbësor për zbatimin e reformës në drejtësi, shprehu gatishmërinë për vazhdimin e bashkëpunimit dhe vlerësoi kontributin e këtij Komisioni në ofrimin e opinioneve dhe rekomandimeve në lidhje me çështjet ligjore që trajtohen në institucionet e Republikës së Kosovës”, ka njoftuar Kuvendi.

Në Ministrinë e Drejtësisë javë më parë, kanë thënë që opinioni final i Komisionit të Venecias pritet të përfundohet në muajin qershor.

Në draft-opinion, të cilin e ka parë KOHA, rekomandohet që verifikimi i prokurorëve dhe gjyqtarëve të bëhet nga mekanizmat përbrenda KPK-së e KGJK-së, e juristët i kanë thënë televizionit se rastet kur opinioni dallon në thelb nga draft-opinioni, janë të rralla.

Në Vetëvendosje është folur gjatë për vettingun. Ky proces ka qenë një prej shtyllave kryesore për të cilat ka folur kryeministri Albin Kurti në fushatë.