Me moton se shkolla nuk të bë njeri, por të gjen punë, sot në sheshin ‘Zahir Pajaziti’ në kryeqytet është hapur fushata për edukimin dhe aftësimin profesional “EYE”, e iniciuar nga Zyra Zvicerane për Zhvillim dhe Bashkëpunim në Kosovë dhe Qendra për Karrierë në Prishtinë.
Durim Hoxha, menaxher i projekti “EYE”, ka bërë të ditur se qëllimi i këtij projekti është prezantimi i disa aktivitete që kanë të bëjnë me aftësimin dhe arsimin profesional.
Drejtori i Zyrës Zvicerane për Zhvillim dhe Bashkëpunim në Kosovë, Patrick Ettiene shprehu përkrahjen e shtetit zviceran për sistemin e edukimit në Kosovë.
Sipas tij mundësia më e mirë për të pasur karrierë dhe të ardhme të sigurt është aftësimi profesional.
Drejtori i Departamentit për Arsim në Komunën e Prishtinës, Jonuz Salihaj ka deklaruar se janë duke punuar në zbatimin e sistemit dual të arsimit, dhe gjetjen e vendeve të punës për nxënësit që kryejnë arsim profesional.
Sipas tij në shkollat e kryeqytetit janë duke investuar që nxënësit t’i përgatisin sa më shumë për tregun e punës.
Drejtoresha e Cactus Education, Vildane Kelmendi duke shpalosur mundësitë e kësaj shkolle, tha se përmes shkollimit profesional arrihet punësim i sigurt.
Projekti “EYE” implementohet nga Helvetas dhe MDA, ndërsa në Kosovë ka gjetur mbështetjen nga “Shkolla Digjitale”, “BoneVet”, “Qendra për Këshillim në Karrierë”, “Qendra për Karrierë”.