Në Mitrovicë të Veriut gjenden barna të paautorizuara për tregun vendas

Ministria e Shëndetësisë ka njoftuar se Inspektorati Farmaceutik gjatë inspektimit nëpër barnatore private në Mitrovicën veriore ka gjetur sasi të madhe të produkteve medicinale të paautorizuara për tregun vendas.

Sipas njoftimit, produktet e gjetura ishin të pajisura me banderolë të Serbisë, ose të  Maqedonisë ose dhe pa banderolë. 

“Në njërën nga barnatoret e qytetit u hasën edhe produkte medicinale me banderolë të kuqe që janë të dedikuara për sektorin publik të shëndetësisë dhe janë falas për qytetarët apo janë të dhuruara si donacione për Spitalin e Mitrovicës Veriore. Të njëjtat janë keqpërdorur duke u dërguar në barnatore private për t'u shitur”, thuhet  në njoftim. 

Bëhet e ditur se të gjitha produktet medicinale të paautorizuara u konfiskuan nga ana e inspektoratit dhe ditëve në vazhdim do të vazhdohen me procedurat e rregullta.