Në 80-vjetorin e themelimit, ish-punëtorët e vlerësuan lart rolin e RTP-së në emancipimin e shoqërisë

Në përvjetorin e 80-të të themelimit të RTP-së, ish-punëtorë të mediumit u mblodhën pranë objektit ku dikur punuan, për ta shënuar këtë ditë me muzikë e fjalime. Tek e theksuan rëndësinë e RTP-së në emancipimin e shoqërisë, ata shprehën pakënaqësi që për këtë rast nuk ka pasur një organizim institucional

Ish-punëtorë të Radiotelevizionit të Prishtinës u mblodhën të mërkurën para objektit ku dikur kanë punuar, për ta shënuar 80-vjetorin e themelimin të mediumit.

Për këtë rast, ata përgatitën program që i ngjasoi një emisioni të Radios, me pika muzikore e me fjalime.

Ish-producenti i RTP-së, Qemajl Sokoli tha se mediumi në të cilin ka punuar ka luajtur rol të madh në emancipimin e shoqërisë në Kosovë.

“Pas Luftës së Dytë Botërore ne kemi qenë ndër të parët dhe e kemi përcjellë edhe popullin dhe kemi qenë në vorbullat e jetës dhe kemi pasur jehonë ngase zëri i Radio Prishtinës janë dëgjuar dhe mirëkuptuar dhe mirëpritur nga të gjithë. RTP ka qenë pasqyra jonë si dhe pushka më jehuese e kombit”, ka deklaruar Sokoli.

E ish-punëtori Mustafë Halili ka shprehur vërejtjen që për këtë përvjetor të RTP-së ka munguar organizimi institucional.

“Unë mendoj se është dashur ta festojnë bashkë të gjitha institucionet e Kosovës sepse 80 vjet nuk janë pak. Këtë është dashur ta festojnë edhe të gjithë punëtorët e RTK-së bashkë me bashkëpunëtorët tanë të dikurshëm, sepse këtu janë 80 vjet punë”, ka theksuar Halili. 

Edhe Kulturë 15 sht 2026 “Prison Radio” kthen tingullin si mënyrë mbijetese dhe komunikimi

Me rastin e shënimit të 80-vjetorit të themelimit të RTP-së, organizatorët u ndanë mirënjohje figurave të ndryshme nga bota e artit dhe gazetarisë, përfshirë Muharrem Qenën, Rexho Mulliqin, Rexhai Surroin e të tjerë.

Më 5 shkurt 1945 në Prizren u themelua stacioni i parë profesional me program të rregullt ditor në gjuhën shqipe dhe serbe, i quajtur “Radio Prizreni” e me kalimin e administratës në Prishtinë, nga vjeshta e vitit 1946 vazhdoi të funksionojë me emrin “Radio Prishtina”.