-
Nga:
Augustin Palokaj
- 16 tetor 2024 18:31
- Shpërndaje në:
“Situata në Ballkanin Perëndimor mbetet shqetësuese me kërcënimet secesioniste në Bosnjë-Hercegovinë, me situatën e brishtë të sigurisë në Kosovë dhe progresin e vogël në dialogun e lehtësuar nga BE-ja mes Beogradit dhe Prishtinës. Rusia po ashtu po bën përpjekje për ta penguar demokracinë në rajon, përmes kërcënimeve hibride dhe kibernetike përfshirë edhe dezinformimin, po përdor ndjesitë e brendshme për të krijuar ndasi”, është shprehur Rutte në një adresim para gazetarëve
Sekretari i ri i Përgjithshëm i NATO-s, Mark Rutte, e ka kualifikuar situatën e sigurisë në Kosovës dhe në gjithë Ballkanin Perëndimor si të brishtë teksa ka tërhequr vërejtjen për përpjekjet e Rusisë që ta pengojë zhvillimin e demokracisë dhe të krijojë ndasi në rajon.
Këtë Rutte e ka thënë të mërkurën në një adresim para gazetarëve, të mbajtur në prag të takimit të ministrave të mbrojtjes të NATO-s, i cili do të zhvillohet në selinë e Aleancës Veriatlantike në Bruksel gjatë së enjtes dhe të premtes.
“Situata në Ballkanin Perëndimor mbetet shqetësuese me kërcënimet secesioniste në Bosnjë-Hercegovinë, me situatën e brishtë të sigurisë në Kosovë dhe progresin e vogël në dialogun e lehtësuar nga BE-ja mes Beogradit dhe Prishtinës. Rusia po ashtu po bën përpjekje për ta penguar demokracinë në rajon, përmes kërcënimeve hibride dhe kibernetike përfshirë edhe dezinformimin, po përdor ndjesitë e brendshme për të krijuar ndasi”, është shprehur Rutte.
Ai ka bërë të ditur se situata në Kosovë dhe misioni i KFOR-it do të jenë tema që do të shqyrtohen në takimin e ministrave të mbrojtjes.
“Për më shumë se dy dekada, KFOR-i ka ruajtur një ambient të qetë dhe të sigurt për të gjithë qytetarët e Kosovës dhe për lirinë e lëvizjes. Përkushtimi i NATO-s për KFOR-in mbetet i fuqishëm edhe sot”, ka deklaruar Rutte.
Edhe
Kosova dhe Ballkani mbeten prioritet strategjik për NATO-n
Rreth 200 pjesëtarë të Forcës Aleate të Reagimit të NATO-s janë dislokuar së fundmi në Kosovë dhe në Maqedoninë e Veriut për të kryer stërvitje që synojnë rritjen e gatishmërisë dhe mbështetjen e KFOR-it.
Situata në Kosovë është tensionuar që prej vitit të shkuar, me protestat e serbëve në veri, por veçanërisht pas sulmit të armatosur nga një grup serbësh ndaj Policisë së Kosovës në Banjskë, ku pati mbetur i vrarë rreshter Afrim Bunjaku.
Dy javë më parë, ish-kryeministri i Holandës Rutte e ka marrë detyrën e sekretarit të përgjithshëm të NATO-s, duke e pasuar Jens Stoltenbergun.
Ai ka folur edhe për përpjekjet e Rusisë që të krijojë ndasi në rajonin e Ballkanit Perëndimor nëpërmjet fushatave dezinformuese.
Edhe
Rutte: Duhet të sigurohemi që situata në Kosovë të mbetet stabile
“Rusia, po ashtu, po bën përpjekje për të penguar demokracinë në rajon me kërcënime hibride dhe kibernetike, përfshirë edhe dezinformimin. Ajo po përdor ndjesitë e brendshme për të krijuar ndasi“, ka theksuar ai.
Takimi i së enjtes dhe i së premtes do të jetë i pari i Këshillit të Atlantikut të Veriut në nivel të ministrave të Mbrojtjes, nën udhëheqjen e Ruttes.
