Murati: Opozita bllokoi edhe integrimin e Kosovës në sistemin evropian të pagesave

Ministri në detyrë i Financave, Hekuran Murati, ka deklaruar se partitë e tjera s'po e bllokojnë vetëm konstituimin e Kuvendit, por tha se ato e kanë bllokuar edhe integrimin e Kosovës në sistemin evropian të pagesave, i njohur si SEPA.

Ai ka shkruar në Facebook se dërgimi në Gjykatën Kushtetuese i këtij ligji ia pamundësoi mërgatës dhe diasporës që rreth 50 milionë euro tarifa të kurseheshin çdo vit.

Ai pyeti “mos vallë edhe për këtë i ka fajet Albin Kurti”.

“Aktiviteti bllokues i opozitës nuk ka filluar vetëm tash me bllokimin e konstituimit të Kuvendit. Për shembull, opozita e ka bllokuar edhe integrimin e Kosovës në SEPA, duke dërguar në Gjykatë Kushtetuese ligjin për Shërbimet e Pagesave, ligj i cili është transpozim i direktivës së BE-së dhe njëkohësisht parakusht për integrim në SEPA. SEPA është sistemi evropian i pagesave që mundëson transferta ndërkombëtare të parave me kosto minimale. Rreth 50 milionë euro tarifa në vit do të kursenin bizneset dhe diaspora jonë, nëse do të anëtarësoheshim në SEPA. A mos vallë edhe për këtë i ka fajet Albin Kurti?”, ka shkruar ministri në detyrë i Financave.

Ligji për pagesat ishte dërguar në Kushtetuese për interpretim muaj më parë nga Partia Demokratike e Kosovës, së bashku me disa ligje të tjera.

Zëvendëskryeministri në detyrë, Besnik Bislimi, ishte shprehur se nëpërmjet anëtarësimit të Kosovës në SEPA, do të ulej kostoja e pagesave ndërkufitare.

“Anëtarësimi në SEPA do të sjellë dhe një ulje të kostos së pagesave ndërkufitare deri në 55 milionë euro në vit. Ato janë një lehtësim i madh për familjet që pranojnë para nga të afërmit jashtë vendit dhe për bizneset që operojnë me partnerë ndërkombëtarë. Pra PDK-ja po ka qëllim që t’i dëmtojë qytetarët dhe bizneset në koston e të paktën 55 milionë eurove në mënyrë direkte në vit”, ishte shprehur Bislimi.