-
Nga:
Luljeta Beselica
- 26 qershor 2020 21:17
- Shpërndaje në:
Pacientët e infektuar me Covid-19 kanë filluar të trajtohen edhe nëpër spitale regjionale.
Që nga paraqitja e rasteve të para me koronavirus, pacientët e prekur janë referuar vetëm në Klinikën Infektive në QKUK.
Por meqë kjo e fundit ka filluar të mbingarkohet, Ministria e Shëndetësisë ka vendosur që këto raste, të cilat nuk kanë komplikime, të trajtohen në komunat e tyre.
“Me rritjen e fluksit të pacientëve që kanë ardhur nga spitalet regjionale, na ka detyruar që të urdhërojmë drejtorët e këtyre spitaleve të krijojnë reparte infektive të zgjeruara, në mënyrë që pacientët të dyshuar për Covid-19 dhe me simptomatologji të lehtë, të nevojshëm për hospitalizim, të pranohen në spitale regjionale. Këto spitale në bashkëveprim me IKSHPK-në të marrin mostrat dhe pacientët e tillë të mos referohen për në Infektive. Dhe në rast të komplikimeve të udhëzohen në Klinikën Infektive”, ka thënë drejtori i SHSKUK-së, Basri Sejdiu, në një përgjigje me shkrim për KOHËN.
Ai ka shtuar se janë takuar me të gjithë drejtorët e këtyre spitaleve dhe janë pajtuar me këtë gjë.
Edhe
Klinika Infektive nuk ka më shtretër për të prekurit me koronavirus
Por drejtorët e spitaleve rajonale u kanë bërë apel qytetarëve që t’iu përmbahen rekomandimeve të IKSHPK-së.
Spitali rajonal i Prizrenit, që ka 5 infektologë, është i vetmi që ka hapësirë të mjaftueshme për trajtimin e këtyre rasteve.
Spitali rajonal i Gjakovës dhe ai i Pejës i kanë nga dy infektologë, dhe në repartet e infektives kanë kapacitet prej 20-30 shtretër.
Në Spitalin e Gjilanit janë 5 infektologë, dhe ka kapacitet prej 10 shtretërve për pranimin e pacientëve.
Për këtë Ministria e Shëndetësisë ka punësuar edhe 200 mjekë, prej tyre edhe infektologë.
Edhe
Konfirmohen raste të riinfektimit me Covid-19 në Kosovë
Përderisa spitali rajonal i Mitrovicës ka dy infektologë, aty nuk ka hapësirë për trajtimin e personave të prekur me COVID-19, andaj janë të detyruar që pacientët t’i referojnë për në Klinikën Infektive në QKUK.
Gjendje e njëjtë me këtë të Mitrovicës është edhe në Spitalin e Ferizajt.
