Mbi 9 mijë bashkatdhetarë mbërritën të shtunën në Aeroportin e Prishtinës

Ministri i Infrastrukturës, Arban Abrashi përmes një statusi në Facebook, ka njoftuar se vetëm gjatë së shtunës në Aeroportin e Prishtinës kanë mbërritur 9 mijë bashkatdhetarë.

Po ashtu ai ka bërë të ditur se ka kërkuar nga autoritetet përkatëse që të rrisin përpjekjet që turma e personave që presin udhëtarët jashtë terminalit të menaxhohet më mirë.

“Vetëm përmes Aeroportit të Prishtinës sot arritën mbi 9 mijë bashkatdhetarë, dhe u realizuan mbi 35 fluturime komerciale. Ardhja e bashkatdhetarëve për fundvit është lajm i mirë si për ekonominë ashtu edhe për familjet Kosovare që bashkohen në këto ditë festash. Situata në Aeroport raportohet të jetë nën kontroll sa i përket zbatimit të masave anticovid brenda terminalit, megjithatë kam kërkuar nga autoritetet që të rrisin përpjekjet që turma e personave që presin udhëtarët jashtë terminalit të menaxhohet më mirë”, ka shkruar Abrashi në Facebook.

KOHA ndërkohë e cila qe e pranishme në Aeroportin e Prishtinës të shtunën në mbrëmje, ka parë që Policia e Kosovës është duke bërë kontrolle edhe në vetura.