Mbështetja e Francës është e një rëndësie të veçantë për Kosovën, thotë Haradinaj

Kryeministri i Republikës së Kosovës, Ramush Haradinaj, priti në takim Drejtoreshën për Evropën Kontinentale të Ministrisë për Evropë dhe Punë të Jashtme të Francës, Florence Mangin.

Në këtë takim, Haradinaj e ka njoftuar Manginin për prioritetet e qeverisë në zhvillimin ekonomik, forcimin e rendit dhe ligjit, angazhimin e institucioneve për anëtarësim në organizata ndërkombëtare, me theks të veçantë anëtarësimin në INTERPOL.

“Duke qenë pjesë e organizatave ndërkombëtare, Kosova bëhet partnere në luftimin e krimit transnacional dhe i kontribuon paqes në rajon dhe në botë”, tha Haradinaj.

Gjithashtu, ai e informoi Manginin për të arriturat e Kosovës në procesin e liberalizimit të vizave si dhe e quajti sukses anëtarësimin e Kosovës në organizatën Frankofone, duke theksuar se mbështetja e Francës është e një rëndësie të veçantë për vendin tonë.

“Franca ka luajtur rol konstruktiv në të gjitha proceset e shtetndërtimit të Kosovës, andaj populli ynë është përherë falënderues për ndihmën e madhe të këtij shteti mik. Në këtë etapë të konsolidimit ndërkombëtarë të vendit, ndihma e Francës është e nevojshme, veçmas në proceset integruese të Kosovës”, tha Haradinaj, duke kërkuar thellimin e bashkëpunimit në të gjitha fushat e interesit të të dyja shteteve, veçmas në fushën e ekonomisë.

“Kosova e meriton liberalizimin e vizave dhe ka përmbushur të gjitha obligimet e saj. Andaj, roli konstruktiv i Francës në këtë proces është i rëndësishëm. Me liberalizimin e vizave për Kosovë, vendet europiane fitojnë një partner më shumë, fitojnë një konsumator më shumë në ekonominë e tyre”, shtoi ai.

Edhe Arbëri 5 muaj më parë Macroni uron 18-vjetorin e Pavarësisë: Normalizimi i raporteve me Serbinë, çështje e sigurisë evropiane

Nga ana e saj, Drejtoresha për Evropën Kontinentale të Ministrisë për Evropë dhe Punë të Jashtme të Francës, Florence Mangin, e ka përgëzuar Kryeministrin Haradinaj për punën e mirë që po e bën dhe për reformat e gjithëmbarshme në vend, duke e konfirmuar mbështetjen e Francës edhe në të ardhmen.

Në takim ishte i pranishëm edhe ambasadori francez në Kosovë, Didier Chabert.