Mbështete KOHËN. Ruaje të vërtetën
Arbëri

Liderët politikë e quajnë të dhimbshme situatën në familjen e Krasniqit

Jakup Krasniqi

Jakup Krasniqi duke dalë nga shtëpia

Foto: Driton Paçarada

Jakup Krasniqi të enjten në mëngjes është dërguar te shtëpia e tij në Prishtinë, në ditën e dytë të vizitës në Kosovë. Liderë politikë e institucionalë e kanë quajtur të dhimbshme situatën, pasi ai u lejua ta bëjë vizitën shkaku i gjendjes shëndetësore të bashkëshortes, e në anën tjetër nuk u lejua të takohet as me të vëllain

Nën përcjelljen e policisë së EULEX-it, Jakup Krasniqi është dërguar të enjten, për të dytën ditë në shtëpinë e tij në Prishtinë, për ta vizituar bashkëshorten e sëmurë.

Ish-kryetari i Kuvendit, i cili është dënuar në shkallë të parë për krime lufte me 25 vjet burgim, arriti në Kosovë të mërkurën, me leje të posaçme të Gjykatës Speciale në Hagë.

Kryeministri Albin Kurti ka thënë se është jashtëzakonisht e dhimbshme situata e rëndë në familjen e ish-kryekuvendarit Krasniqi.

“Në këto momente të vështira natyrisht që të gjithë bashkëndiejmë me vuajtjen dhe dhimbjen, dhe urojmë që gjithçka të shkojë sa më mirë që është e mundur”, ka thënë ai.

Ndërkaq, kryeparlamentarja Albulena Haxhiu ka theksuar se me shumë dhimbje dhe bashkëndjejnë po e përcjell ardhjen e Krasniqit në Kosovë. 

“Zëri i UÇK-së gjatë luftës, kryetari i Kuvendit që drejtoi seancën historike të shpalljes së Pavarësisë dhe atë të miratimit të Kushtetutës, një nga figurat e rëndësishme të shtetndërtimit të Kosovës. Sot, Jakup Krasniqi po kalon ditë të vështira, larg lirisë dhe në rrethana të rënda familjare, por jo i vetëm”, ka shkruar Haxhiu në Facebook. “Qëndrimi im për procesin dhe aktgjykimin ndaj tij dhe të tjerëve është i njohur. Tani që çështja ndodhet në Apel, do ta vazhdojmë betejën për drejtësi dhe për lirimin e plotë të krerëve të UÇK-së. Jam pranë Jakup Krasniqit, bashkëshortes dhe gjithë familjes së tij. Atyre u uroj forcë dhe që këto ditë, sado të vështira, t’i kalojnë bashkë e në qetësi”.

E ish-kryetari i Partisë Demokratike, Bedri Hamza, ka dhënë kritika për procesin në Hagë. Ai ka thënë se Krasniqi nuk do të duhej të ishte atje.

“E ka bërë edhe moshën dhe ka ardhur për një gjendje familjare ku bashkëshortja e tij nuk është mirë me shëndet dhe jam i bindur që secili qytetar i Republikës së Kosovës e gjithsesi edhe unë, se e kam mik, kam bashkërrugëtuar me të, e njoh, dhe gjithmonë e kam vlerësuar. Nuk është që po ndihem lehtë dhe mirë. Domethënë ai është dashur me qenë në shtëpinë e vet, familjen e vet, afër bashkëshortes së vet, dhe jo në situata të cilat ndodhet”, ka thënë Hamza.

Ish-kryetari i Kuvendit, i cili është dënuar për krime lufte me 25 vjet burgim, arriti në Kosovë të mërkurën në orët e paradites, me leje të posaçme të Gjykatës Speciale, për ta vizituar bashkëshorten, gjendja shëndetësore e së cilës është përkeqësuar. 

Ai nuk ishte vetëm. U shoqërua nga pjesëtarë të sigurisë, ndërkaq rreth shtëpisë u panë automjete të policisë së EULEX-it dhe atyre të Kosovës. Po kështu, edhe të ekipeve të tjera, përfshirë një autoambulancë.

Përpos që vizita familjare u zhvillua nën masa të rrepta sigurie, për të pati edhe kufizime në kontaktet me të afërmit. Një prej personave që nuk arriti ta takojë, është vëllai i tij, Daut Krasniqi. Ai tregoi se nuk iu lejua t’i afrohet shtëpisë, pasi familjarët druheshin se një përpjekje e tillë mund të rrezikonte ndërprerjen e vizitës.

“Vajza e tij me tha mu ‘na ndalin vizitën’. ‘Jo’, i thashë. Unë nuk po dua me prishë”, ka thënë ai.

As të enjten nuk u lejua ta takojë.

Krasniqi ka përfunduar vizitën e ditës së dytë në familjen e tij në Prishtinë, pas disa orësh qëndrimi në shtëpinë e tij. Ai është larguar nga shtëpia me veturat e EULEX-it, nën masa të rrepta sigurie.

Është raportuar se ai do të qëndroj në Kosovë edhe dy ditë të tjera. 

Krasniqi gjendet në paraburgim që nga nëntori i 2020-s.

Ai është dënuar në shkallë të parë për krime luftë nga Gjykata Speciale së bashku me Hashim Thaçin, Kadri Veselin dhe Rexhep Selimin.

Mbrojtja e tij dhe e tre të tjerëve do ta apelojnë vendimin.

Kjo është vizita e dytë që Krasniqi e bën në Kosovë prej kohës kur është arrestuar gjashtë vjet më parë. Vizitën e parë e kishte realizuar më 10 tetor të vitit 2024, pas vdekjes së vëllait të tij, Azem Krasniqi. Edhe atëherë, Trupi Gjykues ia kishte miratuar kërkesën për arsye bindëse humanitare. Gjatë qëndrimit në Kosovë, Krasniqi kishte vizituar varrin e të vëllait në Negroc të Drenasit dhe ishte takuar me familjarët.