Qendra e Lëvizjes Vetëvendosje në Belgjikë ka përmbyllur strukturimin e brendshëm duke zgjedhur kryesinë e re, bëhet e ditur përmes një njoftimi për medie.
Aktivistët e pesë pikave të Lëvizjes në Belgjikë – Anvers, Bruksel, Brugge, Huy dhe Namur – zgjodhën Arben Fetain kryetar të Qendrës. Arbeni është këshilltar në fushën e zhvillimit ndërkombëtar me agjenci të ndryshme ndërkombëtare në Bruksel që nga viti 2009, transmeton Koha.net. Arbeni kishte punuar në Prishtinë në periudhën 2004-2008 si ekspert i çështjeve evropiane me Programin për Zhvillim të Kombeve të Bashkuara dhe me projekte të Komisionit Evropian. Ai është i diplomuar në shkencë politike në Université Libre de Bruxelles dhe ka një master në politika të jashtme të Bashkimit Evropian nga Instituti për Studime Evropiane në Bruksel.
Këshilli i Qendrës në mbledhjen e tij konstituive, zgjodhi Kryesinë e Qendrës. Bujar Krasniqi u zgjodh nënkryetar i parë, Valon Vuçetaj nënkryetar i dytë, Dardan Prebreza sekretar Organizativ dhe Erblin Shala koordinator i Nënkomiteteve. Kryesues i Këshillit u zgjodh Rediart Cankja, i cili do të ketë Gazmend Fetain si zëvendës. Anëtarët e tjerë të Kryesisë u zgjodhën: Agon Efendiu, Ilir Morina dhe Urata Hysenaj.
