Afërsisht 60 milionë euro borxhe, me një vendim të Qeverisë iu falën bizneseve në fillim të këtij muaji.
Këtij vendimi kontradiktor, nga i cili përfituan kompanitë që ambalazhojnë ujë, i kushtohet këtë të diel “Koha Ditore”.
Se si është grumbulluar ky borxh, si erdhi deri te vendimi, pse po konsiderohet si i kundërligjshëm dhe çfarë efekti do të ketë, janë disa nga pikat që shtjellohen nga gazetarja Sanie Jusufi.
Si trajtohen qytetarët e si favorizohen bizneset dhe pse një vendim i tillë krijon precedent të rrezikshëm, shpjegon kryeredaktori Agron Bajrami në temën e javës, ndërsa i intervistuar është Arton Demhasaj, drejtor i organizatës “Çohu”.
Një reportazh të veçantë mund ta lexoni nga fshatrat e Vushtrrisë, ku si formë për të siguruar bukën e gojës, punëtorë rrezikojnë jetën duke nxjerrë qymyr.
Kosovarçe, këtë javë u kushtohet krojeve të Bajgores dhe burimet e ujit të ‘kristaltë’.
Nga bota, veçohen profilet e Robinson Kruzos modern, dhe ai për të vetëquajturin ‘intelektual djathtist’, gjermanin Goetz Kubitschek.
Në shtatë shkronja këtë javë përgjigjet autori Virgjil Muçi, ndërsa në faqet e kulturës, njoftoheni me dy artistë grafiti, Fat Heat dhe Trans One, që qëndruan në Prishtinë.
Sporti, këtë javë sjell profilet e dy futbollistëve gjilanas, Leotrim Kryeziut të Dritës që shkëlqeu me përfaqësuesen u-19 të Kosovës, dhe sulmuesin Betim Haxhimusa të Gjilanit dhe sfidat e tij me lëndimet e shumta.