Deputetja e Lidhjes Demokratike të Kosovës, Rrezarta Krasniqi, ka thënë se pret dorëheqjen e kryeministrit Albin Kurti meqë siç thotë ajo ka dështuar në të gjitha fushat.
Opozita ka rritur zërat së fundmi duke bërë thirrje për dorëheqjen e Kurti. Vetë kryeministri teksa ka hyrë në vitin e fundit të mandatit ka thënë se nuk ka arsye të japë dorëheqje. Mënyra e vetme për largim nga ekzekutivi, Kurti ka thënë se është shpërbërja e Kuvendit.
Krasniqi ka kritikuar edhe marrëveshjen e Kurtit për themelimin e Asociacionit, ndërsa ka thënë se anëtarësimi i mundshëm në Këshillin e Evropës nuk është veç meritë e kësaj qeverie.
“Po presim që Kurti të dorëhiqet sepse ka dështuar në të gjitha dikasteret. Asnjë fushë nuk ka pasur sukses. Në politikën e jashtme, meqë merrna më shumë me të, s’ka asnjë sukses. S’ka asnjë njohje. Anëtarësimi në Këshillën e Evropës nuk është meritë veç e Qeverisë, por kemi lobuar së bashku, të gjitha partitë. Në këso çështje, duhet të jemi të bashkuar. Marrëveshja e Kurtit për Asociacionin është marrëveshja më e keqe që ka pasur Kosova”, ka thënë ajo në “60 Minuta” të KTV-së.
Krasniqi ka përmendur “skandalet” e premtimet e pambajtura të Qeverisë Kurti.
“Kanë ardhur në pushtet me parullën ‘hajnat në burg’, por prej që kanë ardhur në pushtet, vetëm njerëzit e tyre po thirren nga Prokuroria. Katër vjet janë marrë me skandalet e ministrave të vet, njerëzve të vet. Rezervat shtetërore, Martin Berishaj, Nagip Krasniqi, Liburn Aliu janë disa prej tyre. Asgjë çka kanë thënë, nuk e kanë bë. S’ka çerdhe, s’ka banesa sociale, s’ka rrymë më të lirë, por më të shtrenjtë, ushqimet s’janë më lirë, ashtu siç kanë premtuar”, ka deklaruar deputetja e LDK-së.
Edhe
Deputetja e LDK-së: Për gati tri vjet të Qeverisë Kurti nuk kemi parë asnjë progres
Kritika ka pasur edhe për dialogun, teksa ka thënë se Qeveria po shkon të diskutojë në Bruksel për çështje si dinari, “kurse në kohën e Avdullah Hotit diskutohej njohja reciproke”:
“Veç kanë dëshirë me bë kriza, me fsheh mospunën, asnjë dikaster s’po bën asgjë. Qe katër vjet, s’kanë bë kurrgjë”, ka thënë Krasniqi.
