Kryeministri i Kosovës, Albin Kurti, e ka vlerësuar hap të rëndësishëm drejt integrimit të serbëve, konvertimin e patentë-shoferëve nga ato ilegale në zyrtare të Republikës së Kosovës.
Në afatin për regjistrimin e tyre, që nisi më 9 maj, 6509 persona konvertuan patentë-shoferët ilegalë të lëshuar nga Serbia në ato RKS.
Në një shkrim në Facebook, Kurti ka thënë se kjo periudhë ka kaluar pa asnjë incident a ankesë.
“Qytetarët tanë nga komuniteti serb kanë bërë një hap të rëndësishëm drejt integrimit, duke iu përgjigjur në masë thirrjes për aplikim për konvertimin e këtij dokumenti. I falënderoj të gjithë qytetarët tanë të cilët e shfrytëzuan pozitivisht këtë mundësi, si dhe zyrtarët e institucioneve tona në zyrat e qendrat e regjistrimit, për punën e tyre dhe asistimin e aplikuesve në këtë proces”, ka shkruar ai në Facebook.
Nisur nga java e ardhshme, më nuk do të lejohet ngasja e automjeteve me dokument jovalid, ka bërë të ditur zëvendëskomandanti i Policisë për rajonin e Veriut, Veton Elshani.
Ministria e Punëve të Brendshme (MPB) pati vendosur që nga 9 maji i këtij viti t’ua lejojë serbëve t’i konvertojnë patentë shoferët ilegalë në RKS, pa pasur nevojë që t’u nënshtrohen provimit.
Edhe
3941 serbë kanë aplikuar për t'i konvertuar patentë shoferët ilegalë në RKS
Vendimi i Qeverisë dhe i Ministrisë për t’u mundësuar serbëve lehtësira për pajisje me patentë shoferë të Kosovës ishte mirëpritur nga Shtetet e Bashkuara (SHBA), Britania e Madhe, Gjermania dhe Italia.
Procedura për pajisje me patentë shoferi të Republikës së Kosovës zgjat pesëmbëdhjetë ditë. Patentë shoferi i lëshuar nga strukturat serbe i kthehet aplikuesit si dokument i pavlefshëm dhe i njëjti pajiset me patentë shoferin e Republikës së Kosovës.
Konvertimit të patentë shoferëve të Serbisë me ato të Kosovës i ka paraprirë procesi i riregjistrimit të automjeteve nga targat ilegale serbe me akronime të qyteteve të Kosovës në ato RKS.
Çështja e riregjistrimit të automjeteve në fund të vitit 2022 ishte bërë shkak i një sërë krizash në veri të Kosovës, përfshirë largimin e serbëve nga institucionet e Kosovës, protestat, barrikadat dhe bojkotin e zgjedhjeve. Krizat kulmuan me një sulm të armatosur ndaj Policisë së Kosovës nga një grup serbësh më 24 shtator të vitit të shkuar në Zveçan.
