Përditësim 20:00 - Për gati dy orë pikëkalimet kufitare me Maqedoninë e Veriut kanë funksionuar me kontroll të dyfishtë, për shkak të problemeve me sistemin e Policisë në Maqedoni.
Siç ka njoftuar Qendra Kombëtare për Menaxhim Kufitar, për shkak të rënies së sistemit, veturat që hyjnë në Maqedoninë e Veriut janë regjistruar mekanikisht dhe se si pasojë ka pasur kolona të gjata të shkaktuara.
“Ju njoftojmë se sot është raportuar rënia e sistemit të Policisë së Maqedonisë së Veriut në gjithë territorin e saj. Si pasojë e kësaj ndërprerjeje teknike, autoritetet maqedonase kanë pezulluar përkohësisht hyrjen e automjeteve në territorin e RMV-së. Tani kanë filluar mekanikisht regjistrimin dhe deri sa të kthehet sistemi kufitar i MKDV- së është kthyer kontrolli i dyfishtë! Ka kolona të gjata në territorin e RMV-së. Do t’u mbajmë të informuar në kohë reale për çdo zhvillim të mëtejmë lidhur me këtë situatë”, u tha në njoftimin e parë të kësaj qendre, para se më vonë të lajmëronte se gjithçka është rikthyer në normalitet.
Nga prilli, Kosova dhe Maqedonia e Veriut përuruan pikëkalimin e përbashkët kufitar Hani i Elezit – Bllacë. Nga ai moment ka pasur vetëm një ndalësë kontrolli në hyrje të shtetit pritës. E nga qershori një kontroll është edhe në pikëkalimin tjetër Glloboqicë-Jazhincë.
Ditëve të fundit, pikëkalimi në Han të Elezit është mbyllur përkohësisht në dy raste, si pasojë e zjarreve në Maqedoni.
