Kronika Zgjedhore/ Haradinaj i bindur në fitoret e kandidatëve të AAK-së

Tubimet përmbyllëse të Aleancës për Ardhmërinë e Kosovës u mbajtën në Gjakovë, Istog, Junik e Rahovec. Nën premtime të shumta e akuza ndaj kundërkandidatëve u zhvilluan këto takime me qytetarët. Mbështetje atyre në ditën e fundit u dha edhe kryetari i AAK-së, Ramush Haradinaj

Në tubimin përmbyllës të fushatës së balotazhit, kandidati për kryetar të Gjakovës, Ardian Gjini, e filloi me kritika ndaj kundërkandidates së tij. Gjini tha se do ta çlirojë Gjakovën nga ide të ndarjes.

“Ka njerëz që dalin diku e thonë që duhet me e çliru Gjakovën. A e dini se prej kujt dojnë me e çliru Gjakovën?! Prej meje. S’kanë qysh me e çliru se unë jam këtu me ju. Në fakt, Gjakova ka nevojë me u çliru edhe pak prej njerëzve oportunistë që vijnë kohë pas kohe e i bëjnë njerëzit me u nda. Prej kësaj gati është me u çliru na duhet veç edhe pak që mos me u kthy në Gjakovë ide të tilla”, deklaroi Gjini.

I bindur për fitore, kryetari i AAK-së, Ramush Haradinaj, bashkë me kandidatin për kryetar, Agron Kuçi, i dhanë fund fushatës në Junik.

“Kur do populli, do Zoti. Ata që mundohen ta prishin këtë të drejtë në mënyra të tjera gabojnë. Ky është vend i vogël, ju jeni një familje. Unë e di se ashtu që ju shoh sot, ju do të fitoni bindshëm. Por fituesi e ka obligim të sillet përgjegjshëm, me respekt dhe të mos bëjë diskriminim. Me ju dhënë të gjithëve meritën që parasheh ligji. Po ashtu, edhe ne që e ndiejmë Junikun, e kemi për obligim që ta përkrahim Junikun, me projekte zhvillimore”, u shpreh Haradinaj, ndërsa që kandidati Kuçi premtoi zhvillim të qëndrueshëm lokal.

“Ne do të ndërtojmë në gjithë sektorët e jetës publike për zhvillim të qëndrueshëm lokal, për të krijuar vende të reja të punës. Kjo është fitore për mijëra junikas. Unë jam shumë i vendosur dhe i përkushtuar maksimalisht që të jem kryetar i të gjithëve. Këtë nuk mund ta vendosim vetë, por të bashkuar për një Junik rural dhe urban, ku secili prej nesh gra e burra, vajza e djem, për një Junik të prosperuar, i cili është edhe amanet i paraardhësve dhe pasardhësve, ky është obligimi ynë sot dhe nesër”, ka thënë Kuçi.

E në tubimin përmbyllës në Istog, Ramush Haradinaj falënderoi një kategori të veçantë të shoqërisë.

Edhe Zgjedhjet lokale 8 nën 2025 Gjini: Do ta vazhdojmë punën për ta bërë Gjakovën qytet ku ia vlen të punohet e jetohet

“Më vjen mirë që edhe sot po bëhemi bashkë për diçka shumë të mirë, për ma të mirën të mundshme, me i dhanë Istogut një qeverisje që është e re, që ka vlera, që është e juaja dhe e cila si dikur e bashkon Istogun me vlerat qeverisëse më të mira që i ka Kosova. Ju dikur keni ditur me e bashku Istogun me vlerat e lirisë. Unë kam ardhur me ju kërku jo ndihmën e juaj, por punën tuaj”.

Tubime përmbyllëse janë zhvilluar edhe në Rahovec.