Krerët shtetërorë të Kosovës kanë uruar Ukrainën për Ditën e Pavarësisë. Ukraina sot feston përvjetorin e 32-të të Pavarësisë.
Presidentja e Kosovës, Vjosa Osmani, nëpërmjet një urimi në platformën “X”, ka thënë se “shpirti i ukrainasve mbetet i pathyer”.
“Nga një tokë e forcës, demokracisë dhe shpresës në tjetrën, i urojmë popullit të guximshëm të Ukrainës – Gëzuar Ditën e Pavarësisë”, ka shkruar Osmani.
E në ambientet e Ballkonit të Hapur të Qeverisë së Kosovës, kryeministri i Kosovës, Albin Kurti bashkë me ministren e Jashtme Donika Gërvalla, mirëpritën qytetarët ukrainas të strehuar në Kosovë, në mesin e tyre edhe gazetarë ukrainas në kuadër të programit Gazetarët në Rezidencë.
Kurti në adresimin e tij tha se Republika e Kosovës qëndron plotësisht prapa Ukrainës në këtë mision të shenjtë. Ai përmendi edhe Deklaratën e Përbashkët të G7-s për mbështetjen e Ukrainës, e të cilës iu bashkua Kosova.
Edhe
Kosova zotohet t’i qëndrojë në krah Ukrainës
“Vetëm këtë javë, ne iu bashkuam Deklaratës së Përbashkët të G7-s për Mbështetjen për Ukrainën. Duke vepruar kështu, ne shprehim gatishmërinë tonë për të kontribuar gjithçka që mundemi për mbrojtjen e Ukrainës, në këtë kohë nevoje”, tha Kurti.
Ministrja e Jashtme, Gërvalla, tha se nuk ka “kompromis për pavarësi, sovranitet dhe dinjitet”. Ajo shtoi se është e bindur se Ukraina do ta fitojë luftën.
Kurti po ashtu përmendi takimin që pati të hënën në Athinë me presidentin e Ukrainës, Volodymyr Zelensky.
“Ishte nder të takohem nga afër me presidentin Zelensky. Shpresoj që në takimet e ardhshme ne mund të diskutojmë se si Kosova e Ukraina mund të punojnë së bashku për të promovuar vlerat tona të përbashkëta dhe interesin tonë të përbashkët”, ka thënë Kurti në fjalimin e tij. “Si pjesë e përkushtimit tonë për popullin ukrainas që nga fillimi i luftës ishte gatishmëria për të strehuar deri 5000 ukrainas të zhvendosur nga konflikti. Disa prej tyre janë këtu sot me ne, i uroj mirëseardhje të veçantë në këtë Ditë të Pavarësisë”.
Zelensky mori pjesë në darkën e ftuar nga kryeministri i Greqisë, Kyriakos Mitsotakis, për nder të 20-vjetorit të Samitit të Selanikut, e ku u ftuan liderët e gjashtë shteteve të Ballkanit Perëndimor si dhe ata të BE-së.
Edhe
Kurti uron Ukrainën për Ditën e Pavarësisë: Kosova do t’i qëndrojë afër
Kurti kishte publikuar një video duke u përshëndetur shkurtazi me Zelenskyn para darkës.
Zelensky në videon e postuar në platformën “X” kishte përmendur takimet me liderët në Athinë, por nuk përmendi askund Kosovën.
“Katër vizita. Suedi, Holandë, Danimarkë, Greqi. Samiti Ukrainë – Ballkan. Bisedime me liderët e Bullgarisë, Serbisë, Kroacisë, Malit të Zi, Maqedonisë së Veriut, Moldavisë, Komisionit Evropian. Ne kthehemi në shtëpi me një përkrahje të re politike dhe marrëveshje që e bëjnë Ukrainën më të fortë”, ka shkruar Zelensky.
Pushtimi rus i Ukrainës nisi më 24 shkurt të vitit të kaluar. Kosova iu bashkua masave që ndërmori bota demokratike kundër Rusisë.
Edhe
Kurti: Solidariteti i Kosovës me Ukrainën nuk ka qenë kurrë transaksion
Four visits. Sweden, the Netherlands, Denmark, Greece. The Ukraine-Balkans Summit. Talks with leaders of Bulgaria, Serbia, Croatia, Montenegro, North Macedonia, Moldova, the European Commission. We return home with new political support and agreements that make Ukraine stronger. pic.twitter.com/M5E7iQMK1r
— Володимир Зеленський (@ZelenskyyUa) August 22, 2023
Honored to celebrate ?? Independence Day w/ Ukrainians living in ??, incl. fellows of the Journalists in Residence program. Though far from home, they continue to make a valuable impact on their country. ?? remains steadfast in its support for them & against Russia's illegal war. pic.twitter.com/IPGzPMMyGe
— Albin Kurti (@albinkurti) August 24, 2023
