Faqe të re të marrëdhënieve ndërmjet Kosovës dhe SHBA-së e ka quajtur presidenti Hashim Thaçi marrëveshjen me MCC-në për 49 milionë dollarë donacion, të cilat do të përqendrohen në sundim të ligjit dhe zhvillim ekonomik.
Shkaku i mos luftimit të korrupsionit dhe zhvillimit të dobët ekonomik, Kosova nuk arriti të merrte 500 milionë dollarë donacion nga Agjencioni Federal Amerikan “Korporata e Sfidave të Mileniumit”. Ky donacion i shkoi Nepalit që ka arritur sukses në sundimin e ligjit dhe zhvillim ekonomik.
Në njoftimin e MCC-së për ndarjen e 500 milionë dollarëve për Nepalin thuhet ky shtet ka avancuar në sundim të ligjit, në lirinë ekonomike dhe ka investuar në popullin e saj, ndërsa Thaçi marrëveshjen për 49 milionë dollarë e ka quajtur si “mjet i ri shumë i fuqishëm i mbështetjes për qytetarët e Kosovës”.
“Këto investime do ta ndihmojnë Qeverinë e Kosovës dhe bizneset kosovare të merren me furnizimin me energji elektrike, me kursimin e energjisë dhe me bërjen e Qeverisë transparente për qytetarët”, ka shkruar Thaçi në Facebook.
“Do të jemi gjithmonë mirënjohës ndaj administratës amerikane, kongresmenëve dhe senatorëve për përkushtimin e tyre ndaj Kosovës dhe për sjelljen e MCC-së”, ka shtuar ai.
“Tani është obligim i institucioneve të Kosovës që të fillojnë të punojnë që nga nesër për ta bërë këtë marrëveshje një arsye për festim për mijëra njerëz në Kosovë”.
Edhe
Nepali merr 500 milionë dollarë nga MCC-ja, Kosova veç 49 milionë për shkak të mos luftimit të korrupsionit
Për nënshkrimin e marrëveshjes për 500 milionë dollarë për Nepalin shkoi ministri i financave të këtij shteti, derisa për 49 milionë dollarët për Kosovën shkoi për të nënshkruar në Washington presidenti Thaçi.
500 milionë dollarë është granti më i madh i MCC-së dhe jepet përmes përzgjedhjes garuese mes vendeve të varfra që janë qeverisur më së miri.
