Shërbimi Spitalor, Klinik, Universitar i Kosovës (SHSKUK) i ka kërkuar Komunës së Prishtinës që të trajtojë çështjen e qenve endacakë në oborrin e Qendrës Klinike Universitare të Kosovës (QKUK).
Në një njoftim në Facebook SHSKUK-ja ka shkruar se prania e qenve endacakë në oborrin e QKUK-së, vazhdon të paraqes shqetësim për stafin, pacientët, familjarët dhe qytetarët që frekuentojnë këto hapësira.
Aty thuhet se SHSKUK-ja nuk ka kompetencë të merret me këtë çështje.
“Duke marrë parasysh faktin se me legjislacionin në fuqi, SHSKUK, nuk ka kompetencë të trajtojë këtë çështje, disa herë i jemi drejtuar Komunës së Prishtinës, përfshirë edhe ditën e sotme që është përsëritur kjo kërkesë. Mes tjerash SHSKUK, në kërkesë ka kërkuar që me prioritet të trajtohen qentë endacak në oborrin e QKUK, meqë ka frekuentim të madh të pacientëve, familjarëve dhe qytetarëve të tjerë”, thuhet në njoftim.
Komunës thuhet se i është kërkuar që të ofrojë zgjidhje të shpejtë, qoftë përmes strehimoreve, apo trajtimit të tyre.
“Andaj, edhe përmes këtij apeli publik, i bëjmë thirrje Komunës së Prishtinës dhe institucioneve tjera të bëjnë zgjidhje të shpejtë për këtë çështje”, thuhet në njoftim.
