Kryetarët e komunave ku operon ndërmarrja “Pastrimi” janë takuar dhe shprehur të gatshëm për decentralizimin e kësaj ndërmarrjeje, thuhet në një njoftim të Komunës së Prishtinës.
Në njoftimin e Komunës së Prishtinës thuhet se lidhur me zgjidhjen e statusit të ndërmarrjes, përfaqësuesit e ndërmarrjes janë njoftuar se është zhvilluar një takim i thirrur nga kryetari i Kryeqytetit, Përparim Rama, me kryetarët e komunave tjera aksionare, “të cilët kanë shprehur gatishmërinë për të iniciuar menjëherë procedurat e decentralizimit të ndërmarrjes, në përputhje me legjislacionin në fuqi”.
Ndërkaq, u njoftua se të premten është mbajtur takim edhe me përfaqësuesit e sindikatës së “Pastrimit” me përfaqësues të Komunës së Prishtinës lidhur me kërkesat e parashtruara nga sindikata.
Nga komuna është thënë se grumbullimi i punëtorëve të “Pastrimit” para objektit të Komunës është i panevojshëm.
“Njëra ndër kërkesat kryesore – kontrata për menaxhimin e mbeturinave sipërfaqësore, në vlerë prej 1.5 milionë euro, tashmë është nënshkruar nga të dyja palët. Sa i përket kërkesave të tjera, përfshirë pagesën retroaktive për pesë muaj dhe nënshkrimin e kontratës bazike për shërbime të rregullta të grumbullimit të mbeturinave në territorin e Komunës së Prishtinës, është propozuar që të shqyrtohen mundësitë për zgjidhje brenda kompetencave ekzekutive dhe legjislative të Kryeqytetit, në përputhje me legjislacionin në fuqi”, thuhet në njoftim.
Komuna e Prishtinës insiston se grumbullimi i mbeturinave në gjithë territorin e kryeqytetit, përfshirë edhe fshatrat përreth, po vazhdon të realizohet 24/7 përmes operatorëve të kontraktuar nga Komuna e Prishtinës. Megjithatë, nëpër lagje për ditë me radhë janë parë kontejnerët e stërmbushur me mbeturina.
