Drejtoria Komunale e Arsimit në Podujevë, ka kërkuar të mërkurën nga mësimdhënësit dhe prindërit e nxënësve që të rifillojë procesi mësimor që nga e enjtja.
Në komunikatën e përbashkët të DKA-së dhe Këshillit të Prindërve të Podujevës, e bërë publike nga drejtori i Arsimit, Avni Fetahu, thuhet se kjo kërkesë vjen pasi të dëmtuarit nga situata e krijuar janë nxënësit.
Sipas Fetahut, një numër i madh i mësimdhënësve kanë shprehur vullnet që t’i kthehen procesit.
“Karshi përgjegjësisë që na takon si DKA dhe Këshill i Prindërve nuk mund të rrimë duarkryq karshi kësaj situate, ne kërkojmë nga ana e prindërve në Komunën e Podujevës, që nga nesër t'i dërgojnë fëmijët në shkollë, duke e parë edhe vullnetin e një numri të madh të mësimdhënësve t'i kthehen procesit mësimor. Urojmë që prezenca e nxënësve në shkolla nga nesër të gjej edhe mirëkuptimin e mësimdhënësve të tjerë dhe të fillojë procesi mësimor”, ka shkruar Fetahu në Facebook.
Qëkur nisi greva më 25 shkurt, të cilës i janë bashkuar mësimdhënësit parauniversitar nga pothuajse të gjitha shkollat në Kosovë, procesi mësimor ka nisur në dy fshatra të Kamenicës.
Edhe
Shumica e shkollave të deklaruara në Podujevë kërkojnë pezullimin e grevës
Mësimi në këto fshatra ka filluar nga e marta.
Punëtorët e arsimit dhe të administratës publike po kërkojnë nga Qeveria shtesa në pagë prej 100 eurosh deri në hyrjen në fuqi të Ligjit të Pagave.
