Kolektivi për Mendim dhe Veprim Feminist: Pjesëmarrja në Bordin e Paqes, e rrezikshme për Kosovën

Grupi aktivist, Kolektivi për Mendim dhe Veprim Feminist, e ka vlerësuar të rrezikshëm për Kosovën pjesëmarrjen e shtetit në Bordin e Paqes të themeluar nga presidenti amerikan, Donald Trump. 

Sipas këtij grupi, lëvizja e presidentes Vjosa Osmani që ta fusë Kosovën në këtë bord “e legjitimon gjenocidin në Gazë”. 

Kolektivi përmes një reagimi ka shprehur se Bordi i Paqes synon ta menaxhojë Gazën nëpërmjet vazhdimit të nënshtrimit, uzurpimit dhe shfrytëzimit të burimeve natyrore e njerëzore. Bordin e ka cilësuar “ndërmarrje uzurpatore”. 

“Lëvizja e presidentes Osmani shënon një rreshtim i cili përveç se e legjitimon gjenocidin dhe e bën Kosovën bashkëfajtore në kolonializimin e mëtejshëm të popullit palestinez, paraqet precedent të rrezikshëm për shtetin dhe popullin e Kosovës. FSK-ja, e formuar për të mbrojtur sovranitetin e Kosovës, do të dërgohet për të mbajtur një rend gjenocidal, e në këtë mision do të rrezikohen dhe të vriten në fushëbetejë me ata/o që luftojnë për lirinë e tyre”, thuhet në reagimin e grupit.

Kolektivi për Mendim dhe Veprim Feminist ka thënë se pjesëmarrja e Kosovës është pozicion “krye në vete” i presidentes Osmani dhe “manovrim populist i cili e operacionalizon pro-amerikanizmin si kartë politike që garanton mandat”.

Tutje Kolektivi ka kërkuar që çështja e anëtarësimit në Bordin e Paqes të mos ratifikohet në Kuvend. 

Edhe Arbëri 21 jan 2026 Kosova në Bordin e Paqes me ftesë të Trumpit

“Ne qëndrojmë për çlirimin e çdo populli dhe të tokave të tyre. Ne qëndrojmë në solidaritet me popullin palestinez dhe rezistencën e përpjekjet e tyre për çlirim, sot e përgjithmonë”, thuhet në reagim.

Kosova është shprehur e gatshme të dërgojë trupa në mision paqeruajtës në Gazë.