Kolapsi financiar në Prishtinë, cila është zgjidhja pas konstituimit të Kuvendit Komunal?

Komisioni Qendror i Zgjedhjeve ka certifikuar rezultatet e zgjedhjeve të 12 tetorit për Kuvendin Komunal.

Me certifikimin e rezultateve për kryetar të Prishtinës dhe asamblistë, kryetari Përparim Rama ka kohë dy javë për thirrjen e seancës së parë, në të cilën parashihet të bëhet edhe betimi i asamblistëve e i vetë kryetarit Rama.

Nëse brenda kësaj kohe kryetari Rama nuk e thërret seancën e parë, atëherë asamblisti në moshë më të vjetër ka të drejtë ta thërrasë atë.

Por, mandati i dytë Ramën e gjen me probleme të shumta buxhetore, të cilat u krijuan gjatë mandatit të tij të parë.

Mosmiratimi i buxhetit të vitit 2025 e tani edhe i vitit 2026 ka lënë Prishtinën në një krizë të madhe financiare, duke i lënë kopshtet pa energji elektrike e transportin urban pa mundësi funksionimi. Përderisa, linja të transportit privat i Prishtinës veçse kanë njoftuar pezullimin.

Edhe Arbëri 4 muaj më parë Kabineti “Rama 2” pa drejtorë

“Nga sot ka pezulluar shërbimin linja 3A. Por nga e hëna do t’iu bashkangjiten edhe linjat e tjera private, për shkak të kolapsit financiar në të cilën gjenden kompanitë private. Ka disa muaj që nuk janë paguar nga Komuna e Prishtinës e në këtë mënyrë është i pamundur funksionimi. Të hënën do të protestojmë para komunës në orën 9:00”, thuhet në një reagim të Shoqatës së Transportuesve Privatë.

Sipas drejtorit ekzekutiv të Asociacionit të Komunave të Kosovës, Sazan Ibrahimi, Komuna e Prishtinës mund të kalojë buxhetin e 2026-tës menjëherë pas konstituimit të Kuvendit.

“Kemi 11 komuna që nuk e kanë miratuar buxhetin komunal me kohë, deri më 30 shtator, por tash as niveli qendror nuk e ka të miratuar buxhetin për vitin e ardhshëm. Pra këto 11 komuna mund t’i miratojnë buxhetet komunale pas konstituimit të kuvendeve komunale dhe ato projeksione buxhetore të barten në Ministrinë e Financave dhe ajo e ka obligim ligjor që t’i bartë në Kuvend e Kuvendi para mbajtjes së seancës për miratimin e buxhetit të Republikës së Kosovës për vitin e ardhshëm mund t’i inkorporojë edhe ato projeksione. Legjislacioni në fuqi nuk e obligon Kuvendin e Republikës që t’i marrë parasysh, por deri tash nuk ka ndodhur nëse këto projeksione që të dërgohen me kohë e të mos merren parasysh”, ka thënë ai.

Megjithatë ai potencon se buxheti i komunave është i lidhur drejtpërdrejt edhe me atë qendror.

Edhe Arbëri 5 muaj më parë Kuvendi i Prishtinës të premten mblidhet në seancë të jashtëzakonshme për buxhetin për vitin 2026

Sipas tij, në rast se problemet nuk zgjidhen menjëherë pas zgjedhjeve qendrore, Kosova ka buxhet vetëm edhe për muajt janar dhe shkurt, e nga 1 marsi do të gjendet para një kolapsi financiar.

“Institucionet do të kenë buxhet edhe për shkurt. Nëse nuk do të ketë zgjidhje të këtij problemi, nga 1 marsi Kosova rrezikon të jetë para një kolapsi financiar, që nuk ka ndodhur në Kosovën e pasluftës”, ka deklaruar ai.