Pas zgjedhjeve të 28 dhjetorit mund priten zhvillime të reja në skenën politike, përfshirë ndryshime të rezultatit dhe mundësi për koalicione të reja. Analistët politikë theksojnë se situata e krijuar pas zgjedhjeve të shkurtit dhe bllokada institucionale kanë hapur rrugë për skenarë të rinj në formimin e qeverisë së ardhshme.
Analisti Afrim Kasolli nuk përjashton mundësinë e një koalicioni mes LVV-së dhe PDK-së, ndonëse të dy partitë tradicionalisht kanë pasur “vija të kuqe” ndaj njëra-tjetrës. Ai vlerëson se një marrëveshje e tillë, nëse ndodh, do të justifikohej përballë elektoratit si domosdoshmëri politike. Pavarësisht kundërshtimeve të deritanishme, deklaratat e reja të Albin Kurtit dhe Bedri Hamzës po interpretohen si hapje ndaj bashkëpunimit.
Analisti tjetër, Adrian Zeqiri, pret ndryshime të vogla në rezultat, por që mund të sjellin pasoja të mëdha në konfigurimin politik. Sipas tij, kriza e gjatë institucionale mund të ndikojë në sjelljen e votuesve, duke çuar në pjesëmarrje më të ulët dhe në orientime të reja elektorale, çka hap mundësinë për surpriza në rezultat dhe koalicione.
Megjithatë, qëndrimet e partive mbeten të ndara. Vetëvendosja synon ta rikthejë mbështetjen e vitit 2021 dhe të arrijë rreth 50 për qind të votave për të qeverisur e vetme, ndërsa partitë tjera synojnë ta ulin nën 40 deputetë, duke krijuar kështu hapësirë për një konfigurim tjetër qeverisës dhe për zhbllokimin e temës së presidentit në mars.