Naim Murseli, këshilltar i kryetarit të AKR-së, Behgjet Pacollit, ka bërë të ditur se një person është arrestuar të shtunën mbrëma, shkaku që, sipas tij, ka kërcënuar Pacollin dhe i ka kërkuar para.
Murseli i ka dhënë edhe inicialet e këtij personi.
“Personi i arrestuar në orët e vona mbrëmë, me incialet E.H, i cili kërcënoi z. Pacolli dhe fëmijët e tij i ka kërkuar gjithashtu para”, shkruan ai në Facebook.
Sipas këshilltarit të Pacollit, ky person ka pretenduar edhe të jetë prokuror i Kosovës.
“Ai ka kërcënuar po ashtu me arrestim të Pacolli. E.H ka kërkuar në internet shkollën e fëmijëve, e cila është shkollë publike, të z. Pacolli dhe ka kërcënuar atë se do t'i rrëmbejë dhe do t'i djeg ata për së gjalli. Z. Pacolli është shumë i tronditur dhe i mërzitur emocionalisht nga kërcënimët e bëra”, shkruan ai.
Ndërkohë, vetë Pacolli ka paralajmëruar se do t’i përdorë të gjitha instrumentet ligjore për t’i ndjekur personat, të cilët ka thënë se ia kanë kërcënuar familjen.
“Do përdori të gjithë instrumentet ligjorë që ti ndjek këta persona duke shpresuar që në këtë mënyrë i kontribuoj tërë shoqërisë e cila është e ngopur me dhunë, kërcënime e frikësime”, ka shkruar në Facebook lideri i AKR-së.
“Familja është vlera më e madhe e shoqërisë. Fëmijët janë të shenjtë për secilin prej nesh andaj t’u japim dashuri sa më shumë që mundemi. Shoqëria jonë duhet të ketë kujdes dhe të mos tejkalojë limitet e respektit ndaj familjes e veqanërisht ndaj fëmijëve”, shkruan Pacolli.