KEPTSH-ja me vendim për tekste të reja, të vjetrat që kushtuan rreth 10 milionë euro kishin gabime

Nxënësit e nivelit parauniversitar nga parashkollor deri në shkollën e mesme ka gjasa që vitin e ardhshëm shkollor të mësojnë me tekste të reja. Kështu ka rekomanduar Këshilli i Ekspertëve për Programe dhe Tekste Shkollore në një vendim që e ka nxjerrë javën e kaluar.

Aktualisht vetëm tekstet e parashkollorëve dhe të klasave 1, 2, 6, 7, 10, 11 janë botime të reja, kurse të niveleve të tjera janë të vjetra.

Sipas dokumentit që e ka siguruar KOHA, KEPTSH-i i ka rekomanduar Ministrisë së Arsimit që brenda 7 ditësh të shpallë konkurs për tekstet e të gjitha niveleve, përfshirë edhe ato për komunitetet.

KEPTSH-i ka konstatuar se botimi i teksteve të reja vitin e kaluar është shoqëruar me disa probleme. Ndër to përmenden paqartësitë procedurale rreth shpalljes së konkursit për tekste dhe konkursit për recensentët, procedurë jo e qartë për përzgjedhjen e recensentëve dhe punën e tyre.

Po ashtu, sipas Këshillit, tekstet shkollore nuk përputhen me Kornizën Kurrikulare dhe dokumentet përcjellëse dhe përmbajnë gabime të shumta përmbajtjesore e teknike.

Edhe Arbëri 16 jan 2021 Nga shtatori, klasat 3, 4, 8, 9 dhe 12 me botime të reja

“KEPTSH-i konstaton se pikat e mësipërme, dhe jo vetëm ato, kanë ndikuar në cilësinë e dobët të teksteve të reja shkollore. Prandaj, kjo situatë paraqet domosdoshmërinë që MASH-i të shpallë konkurs të ri për botim të të gjitha teksteve shkollore për vitin shkollor 2021-22”, thuhet në vendim.

E sipas drejtorit të shtëpisë botuese “Libri shkollor”, Bajram Shatri, MASH-i duhet patjetër të shpallë konkurs për tekste të të gjitha klasave meqë, siç shprehet, në konkursin e vitit të kaluar ka pasur shumë parregullsi.

Edhe drejtori i shtëpisë botuese “Luarasi”, Shukri Klinaku, vlerëson se vitin e ardhshëm duhet të ketë tekste të reja për të gjitha klasat, derisa kërkon nga Këshilli që procesi të jetë transparent.

mirëpres këtë vendim, sepse shqyrtimi i dy konkurseve të para ka qenë i mbytur në korrupsion dhe shkelje ligjore. Pa u eliminuar këto dukuri nuk ka tekste të mira shkollore”, ka thënë Klinaku.

Edhe Arbëri 3 sht 2025 Ministria thotë se s’ka rol në përcaktimin e çmimit të teksteve shkollore

Në MASH nuk kanë dhënë përgjigje se kur do të shpallet konkursi dhe nëse kanë mjete financiare që tekstet e të gjitha klasave t’i botojnë të reja.

Ministria e Arsimit vitin e kaluar kishte bërë të ditur se vetëm vlerësimi i teksteve të reja për parashkollorë dhe klasat 1, 2, 6, 7, 10, 11 ka kushtuar rreth 80 mijë euro. Ndërkaq botimi i tyre, sipas Komisionit parlamentar për arsim, kishte kushtuar afër 10 milionë euro.