Inspektorati ndalon punimet në rezervarin e ujit afër groposjes së kafshëve në Ribar të Madh

Inspektorati i Komunës së Lipjanit ka ndërprerë përkohësisht punimet e rezervarit të ujit të pijshëm në fshatin Ribar i Madh derisa të shqyrtohen dokumentacionet e lejes ndërtimore dhe dokumentacionet tjera të ekspertëve pasi që në afërsi prej rreth 150 metrash është bërë groposja e kafshëve me sëmundje të brucelozës.

Inspektorati i komunës është duke e hetuar rastin dhe të gjitha dokumentacionet pasi që për këtë projekt po investon Bashkimi Evropian në bashkëfinancim me Qeverinë e Kosovës. Ky rezervar parashihej t’i furnizojë me ujë të pijshëm disa fshatra të komunës së Lipjanit.

Banorët e fshatit Ribar i Madh kanë kërkuar të ndërrohej lokacioni për groposjen e kafshëve me sëmundje të brucelozës pasi që afër tyre po ndërtohej rezervari për ujë të pijshëm. Në vendimin e inspektoratit të komunës thuhet se, “Ndalohen të gjitha punimet në këtë hapësirë publike, pa leje nga organet kompetente të Komunës së Lipjanit”.

Drejtori i Inspektoratit në komunën e Lipjanit Imer Rrustemi, ka thënë se punimet janë ndërprerë përkohësisht derisa të shqyrtohen dokumentacionet për leje ndërtimore.

“Ky projekt për ujë të pijshëm është në të mirën e disa fshatrave të komunës. Andaj në anën tjetër gruposja e kafshëve është bërë në mënyrë profesionale dhe nuk paraqet ndonjë problem. Ndërkaq rezervari i ujit do të ketë një izolim dhe mbrojtje shumë profesionale, prandaj nuk ka hapësirë për shqetësime”, ka thënë Rrustemi.