Ilir Meta i hap rrugë Bajram Begajt për t’u bërë president

Presidenti i Shqipërisë, Ilir Meta e ka firmosur lirimin nga detyra të shefit të Shtabit të Përgjithshëm, Bajram Begajt, duke i hapur rrugë kështu kandidimit të tij për të qenë kreu i ri i shtetit.

Meta firmosi nga Stambolli, ku ndodhet në një vizitë zyrtare, dekretin për lirimin nga detyra e shefit të Shtabit të Përgjithshëm të Forcave të Armatosura të Shqipërisë, si dhe nxjerrjen në lirim nga shërbimi aktiv në Forcat e Armatosura të gjeneralmajorit Bajram Begaj.

Hapi i radhës është mbledhja e Komisionit të Ligjeve, që nis në orën 16:00 dhe do të shqyrtojë kriteret ligjore kushtetuese të kandidatit që propozoi Partia Socialiste një ditë më parë.

Më pas, në orën 18:00 do të nisë seanca në Kuvend. Sot do të jetë raundi i katërt i procesit për zgjedhjen e presidentit, por i pari ku ka një kandidat, emri i të cilit është depozituar në Kuvend. Në këtë raund mjaftojnë 71 vota, që mazhoranca i ka, për të caktuar kështu pasardhësin e Metës, që dorëzon detyrën më 24 korrik.