Shefi i politikës së jashtme i Bashkimit Evropian, Josep Borrell, ka uruar presidentin e ri të Shqipërisë, Bajram Begajn, pas betimit të dhënë të dielën në Kuvend, si presidenti i tetë me radhë i këtij vendi.
Borrell nëpërmjet një postimi në Twitter, ka shkruar se mezi pret të vazhdojnë rrugën e përbashkët drejt Bashkimit Evropian.
Shefi i diplomacisë së BE-së e ka konsideruar kohën kur Begaj është betuar për president, moment historik në rrugën e këtij vendi drejt integrimit në bllok.
“Urime Bajram Begajt për betimin si President i Shqipërisë. Mandati juaj fillon pasi vendi juaj ka arritur një moment historik në rrugën e tij drejt BE-së. Ne mezi presim të vazhdojmë të ecim përpara në rrugën tonë të përbashkët në BE. Së bashku jemi më të fortë”, ka shkruar ai.
Congratulations to Bajram Begaj on swearing-in as President of #Albania.
— Josep Borrell Fontelles (@JosepBorrellF) July 24, 2022
Your mandate starts as your country has reached a historic milestone on its road to the EU.
We look forward to continuing to move ahead on our common EU path.
We are #StrongerTogether.
Osmani: Me Begajn do t'i thellojmë bashkëpunimet
Presidentja e Kosovës, Vjosa Osmani, e uroi presidentin e Shqipërisë, Bajram Begaj, për marrjen e detyrës. Ajo deklaroi të dielën se me Begajn do t’i thellojnë bashkëpunimet.
“Në inaugurimin e Presidentit Bajram Begaj, i përcolla urimet më të sinqerta për suksese në këtë detyrë të rëndësishme. Bashkë do ta thellojmë bashkëpunimin, jo vetëm në raportet vëllazërore mes Kosovës dhe Shqipërisë, por edhe në rrugën e përbashkët euro-atlantike”, shkroi Osmani në Twitter.
Haradinaj Begajt: Të premtoj bashkëpunim vëllazëror
Kryetari i Aleancës për Ardhmërinë e Kosovës, Ramush Haradinaj, e uroi të dielën Bajram Begajn për marrjen e postit të presidentit të Shqipërisë.
Haradinaj shkroi në Facebook se Begajt i premton bashkëpunim vëllazëror “në çdo kohë dhe rrethanë”.
“I nderuar President, nga zemra ju uroj mbarësi në funksionet e Presidentit të Republikës së Shqipërisë. Ju premtoj bashkëpunim vëllazëror në çdo kohë dhe rrethanë”, shkruan deputeti i AAK-së.
Begajt, urimet i ka shprehur edhe kryetari i Aleancës Kosovare e Re (AKR), Behgjet Pacolli.
“Fillimisht i uroj presidentit Begaj shëndet, lumturi dhe shumë suksese në këtë detyrë të rëndësishme për kombin tonë në këtë kohë”, shkroi Pacolli gjithashtu në rrjetin social Facebook.
Begaj mori detyrën e presidentit të Shqipërisë pasditen e së dielës.
Begaj ulet në karrigen e kreut të Shtetit, pas detyrës së tij të lartë si shef i Shtabit të Përgjithshëm të Forcave të Armatosura, pasi Parlamenti e votoi atë në qershor me 78 vota pro.
