Hoti-Qeverisë: Mos rrezikoni mbështetjen e SHBA-së, mbeteni si regjimi i Enver Hoxhës

Ish-kryeministri i Kosovës, Avdullah Hoti, ka thënë se Kosova ka përfituar shumë sa herë që i ka koordinuar veprimet me Shtëpinë e Bardhë.

Hoti përmes një postimi në Facebook të enjten ka kërkuar nga Qeveria e Kosovës që të mos e rrezikojë këtë mbështetje sepse do të mbetet e izoluar si regjimi i Enver Hoxhës.

“Kur janë koordinuar veprimet tona me Shtëpinë e Bardhë: 1. Ka ndodhur njohja nga Izraeli, 2. E kemi demarkuar praktikisht një pjesë të kufirit me Serbinë, 3. E kemi siguruar mbështetjen për projekte madhore të hekurudhave dhe autostradave, 4. E kemi siguruar mbështetjen nga MCC për gaz dhe energji, 5. E kemi nënshkruar marrëveshjen për insentiva të investimeve dhe qasje në financa në tregje amerikane, 6. E kemi nënshkruar marrëveshjen për teknologji 5G të sigurt. 7. E kemi kornizuar dialogun vetëm për njohje reciproke, pa cenuar integritetin territorial, pa prekur karakterin unitar të shtetit të Kosovës, si dhe duke mos pranuar asgjë pa u nënshkruar marrëveshja për njohje reciproke. Mos e rrezikoni këtë mbështetje, sepse do të mbeteni të izoluar si regjimi i Enver Hoxhës”, ka shkruar Hoti.

Ai ka shtuar se nëse kjo ndodh, Qeveria do të detyrohet t’i lirojë zyrat dhe ta dorëzojë mandatin tek ata që e ruajnë miqësinë me SHBA-në.