Kryetari i Komisionit Qeveritar për Personat e Zhdukur, Andin Hoti, i është drejtuar me një letër përfaqësueses së lartë të Bashkimit Evropian për Politikë të Jashtme dhe Siguri, Kaja Kallas, duke kërkuar nga ajo që të marrë hapa urgjent për çështjen e personave të zhdukur me dhunë gjatë luftës në Kosovë.
Hoti ka thënë se pavarësisht se u miratua Deklarata për Personat e Zhdukur më 2 maj të vitit 2023, Serbia vazhdon t’i bllokojë përmbushjet e detyrimeve të saja dhe po i shkel obligimet që i ka sipas të drejtës ndërkombëtare. Hoti në letër ka shkruar se Bashkimi Evropian ka rol kyç për të siguruar që përpjekjet të mos dështojnë. Ndërsa i ka bërë thirrje Kallasit që të marrë hapa vendimtarë lidhur me këtë çështje.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoHoti ka kërkuar që të hapen menjëherë dhe pa kushte arkivat ushtarake, policore dhe të inteligjencës së Serbisë, përfshirë dosjet e klasifikuara që lidhen me krimet e luftës dhe zhdukjet me dhunë. Ka kërkuar bashkëpunim të plotë nga autoritetet serbe, duke përfshirë lehtësimin e hetimeve mbi përfshirjen e grupeve paramilitare dhe bashkëpunëtorëve lokalë serbë në këto zhdukje me forcë.
Dhe po ashtu masa konkrete për ta mbajtur Serbinë përgjegjëse për refuzimin e saj të vazhdueshëm për të ofruar informacion mbi vendndodhjen e personave të zhdukur dhe lokacionet e varrezave masive të pazbuluara.
“Familjet e të zhdukurve kanë pritur për një kohë tepër të gjatë për të vërtetën dhe drejtësinë që e meritojnë. Besoj se nën udhëheqjen tuaj, mund të sigurojmë që zëri i tyre të dëgjohet dhe që Serbia të detyrohet t’i përmbushë detyrimet e saja morale dhe ligjore”, ka shkruar Hoti.
