Gjatë verës së vitit 2011, derisa isha duke punuar në hartimin e librit tim “Një ditë midis dy epokash” (2 Korriku dhe dokumente të tjera që çuan deri te pavarësia) – Prishtinë 2012, për të qenë korrekt në interpretimin e disa çështjeve kisha dëshirë që të bisedoja me profesorin tim, Kurtesh Saliu, rikujton Hamza Halabaku, i cili në kohën e miratimit të Kushtetutës së Kaçanikut ishte ndihmës i sekretarit të Kuvendit të Kosovës.
Me profesor Kurteshin biseduam për punën që ishte bërë në verën e vitit 1990 për hartimin e Kushtetutës së parë të Republikës së Kosovës që ishte miratuar në Kaçanikun tonë historik, më 7 shtator të vitit 1990.
Gjatë asaj bisede, nga Prof. Dr. Kurtesh Saliu, mësova disa gjëra të rëndësishme. Ai pa përtesë fare më ka treguar për përgatitjen e Kushtetutës së Republikës së Kosovës, e cila ishte punuar në konspiracion të thellë gjatë muajve korrik e gusht të vitit 1990.
Kushtetuta e Republikës së Kosovës ka qenë e gatshme afër një muaj para mbajtjes së mbledhjes së Kuvendit të Kosovës, më 7 shtator 1990, në Kaçanik, citon Halabaku profesor Salihun.
Prof. Dr. Kurtesh Saliu ka deklaruar se fill pas shpalljes së Deklaratës Kushtetuese, që ishte bërë me 2 korrik 1990, disa anëtarë të Komisionit të Kuvendit të KSA të Kosovës për Çështje Kushtetuese nga radha e punëtorëve shkencorë (Prof. Dr. Kurtesh Saliu, Prof. Dr. Ejup Statovci, Prof. Dr. Ismet Salihu, Mr. Fatmir Fehmiu, Prof, Dr. Riza Smaka dhe Halit Muharremi, sekretar i Komisionit Kushtetues të Kuvendit të Kosovës) janë takuar në Gërmi, në hotelin e atëhershëm të quajtur, Hoteli i KNI “Ramiz Sadiku” dhe aty janë marrë vesh që ta hartojnë sa më shpejt Kushtetutën e Republikës së Kosovës.
Në fund është angazhuar Prof. Dr. Kurtesh Saliu që të shkruajë arsyetimin e Kushtetutës. Arsyetimin e kanë shikuar vetëm Prof. Dr. Ejup Statovci dhe Halit Muharremi.
Për mbledhjen e përbashkët të të gjitha dhomave të Kuvendit të KSA të Kosovës të datës 7 shtator 1990, që u mbajt në Kaçanik ishte propozuar ky rend dite:
Shqyrtimi i Propozimit të Kushtetutës së Republikës së Kosovës, për ta miratuar,
Shpallja e Kushtetutës së Republikës së Kosovës,
Shqyrtimi i Propozimit të Ligjit Kushtetues për zbatimin Kushtetutës së Republikës së Kosovës, për ta miratuar,
Shpallja e Ligjit Kushtetues për zbatimin e Kushtetutës së Republikës së Kosovës,
Marrja e Vendimit mbi vazhdimin e punës së Kuvendit të Kosovës, Këshillit Ekzekutiv dhe organeve të tanishme të administratës, deri në zgjedhjen dhe konstituimin e Kuvendit të ri të Republikës së Kosovës,
Shqyrtimi i propozimit të Ligjit mbi bashkimin e qytetarëve në parti politike, shoqata dhe forma të tjera të bashkimit, për ta miratuar,
Shqyrtimi i Propozimit të Ligjit mbi zgjedhjet, për ta miratuar,
Dhënia e pëlqimit për amendamentet kushtetuese për Kushtetutën e RSFJ-së, në bazë të propozimit të KEF-it ,
Shpallja e zgjedhjeve dhe
Aprovimi i Rezolutës për pavarësinë dhe sovranitetin e Kosovës
Të nesërmen, më 8 shtator 1990 derisa me Shaban Brunçaj dhe disa shokë ishim ulur para ish-hotelit “Bozhur” për të pirë kafen e mëngjesit, na u ofrua Zenun Çelaj, i vetmi gazetar i “Rilindjes” që e kishte përcjellë mbledhjen e Kuvendit të Kosovës në Kaçanik dhe pas një përshëndetjeje të zakonshme, pyeti se kush është Hamza Halabaku. Meqë të gjithë e njihnim Zenunin, pa ngurruar fare menjëherë i thashë se unë jam Hamza. Zenuni ma la një zarf të formatit A4 me ngjyrë të verdhë duke më thënë se kjo është për ty. Kur e hapa zarfin e pashë se aty ishte Kushtetuta e Republikës së Kosovës, e miratuar një ditë më parë në Kaçanik, rikujton Hamza Halabaku, i cili, në shkrimin që sot e boton “Koha Ditore”, tregon se në atë kohë kishte pozitën e ndihmës sekretarit të Kuvendit të Kosovës (gjerësisht, sot në “Kohën Ditore”).
