Haradinaj takon Kosnettin: I nevojshëm aktivizimi i SHBA-së në dialog, mos na barazoni me Serbinë

Me ambasadorin e SHBA-së në Kosovë, Philip Kosnett, është takuar edhe ish-kryeministri Ramush Haradinaj, kryetar i AAK-së tash në opozitë.

Haradinaj, shkruan se është i nevojshëm aktivizimi i SHBA-së në dialogun Kosovë-Serbi.

“Prita në takim Ambasadorin e SHBA-ve Z. Philip Kosnett ku diskutuam për vizitën time ne SHBA dhe takimet atje. Ambasadorit Kosnett i thash se është i mirëseardhur dhe i nevojshëm aktivizimi i SHBA-së në dialog”, shkruan Haradinaj në facebook.

Haradinaj, tutje shkruan se “Shtetet e Bashkuara nuk duhet të barazojnë Kosovën me Serbinë si palë sepse orientimet tona në politikë të jashtme kanë kahe të kundërta”.

“Përderisa Kosova stoikisht qëndron prapa SHBA-ve në të gjitha sfidat globale, Serbia vazhdon që të jetë sateliti dhe arma kryesore e Rusisë në Evropë. I paraqita Ambasadorit Kosnett nevojën për marrëveshjen finale që rezulton në njohje reciproke në kufijtë ekzistues dhe kjo duhet të përmbyllet sa më shpejtë”, përfundon Haradinaj.

Edhe Arbëri 11 shk 2020 Haradinaj: SHBA-ja duhet të bëjë presion ndaj Serbisë për ta njohur Kosovën

Kosnetti sot gjatë ditës ka takuar zyrtarë të lartë institucionalë, përfshirë kryeministrin Albin Kurti e kryeparlamentaren Vjosa Osmani, nga të cilët ka theksuar nevojën e heqjes së taksës.

Pas takimit me ta, ambasada amerikane njoftoi për takime tjera të Kosnettit edhe me partitë opozitare.