Haradinaj për vrasjen në Prishtinë: Aktet e tilla kriminale nuk do të tolerohen

Kryeministri në dorëheqje, Ramush Haradinaj, ka reaguar pas vrasjes së një personi dhe tre të plagosurve tjerë në lagjen e Spitalit.

Ai përmes një postimi në Facebook ka shkruar se Prishtina përjetoi sot një ngjarje makabre.

Sipas tij, vrasja e një personi dhe plagosja e shumë të tjerëve, në mes të ditës duke rrezikuar edhe shumë banorë të Lagjes së Spitalit, është tragjedi që i prekë të gjithë.

Ai tutje ka ftuar organet e rendit, që të angazhohen pa ndalë deri në gjetjen e motiveve dhe dorasve të kësaj vrasjeje, duke kërkuar që të njëjtit të marrin dënimin meritor.

“Ngushëllime për familjen që humbën familjarin e tyre dhe lutemi për shëndetin e të plagosurve. Kosova nuk do të lejojë ngjarje të tilla. Ne kemi forcuar në vazhdimësi institucionet e rendit dhe ligjit në vend dhe aktet e tilla kriminale nuk do të tolerohen”, ka shkruar ai.